WalvisBay- varugani vaEtosha Fishing ngesi kuna kuhesera nawa konyima tupu apa kavagusirepo egano lyawo asi varugani vamwe vahepa kuvahagekesa. Eyi kayiwizilirepo paapa epangeroi kaliwiziremo nokugava 5000 metric tonnes omiu epangero eli gava nomfi vana kutumbura asi mackerel omu vana kugazara asi vawapeke evango lyawo nokukara nomavango govarugani. Dogpro ngesi, eparu lyovarugani wokusika ko 430 mokampani zaEtosha Fishing, kampani ezi zakara asi nazo zimwe zanare moNamibia, kazikere moudigu eyi nye kavakere negano asi vahepa kuhageka yirugana, kutameka tupu kwedi oko.
Montumwaraka kavatumine, kampani ngesi kazitente asi kapi vana kuhoroka hena varugani vawo. Nye varugani kapi vana kuvandindira asi vatengure sinkwa ntani koyirugana, nye vahepa kurugana moomu vaturapo magano twaromo, varetemo yiwiozamo mokampani, yimo vana kutanta ngoso. Nomvhura donmonzi dakapita kwakara udigu unene omu kampani zpitamo. Dogoro popo, Etosha kampani kwaturemo ehundiro asi vavape notona 10 000 do horse mackerel vadigwane kepangero omu nye ngano navamona asi kampani kuna kuza komeho. ‘’ Ose ngesi tuna gwana 5000 zonotona kepangero edi kadipitilire moministeli zonomfi omu natutwikira nye kuruganesa varugani vetu. Yirugana kapi nayitameka tupu ngesi, morwa kampani dogoro ngesi kuna kutara nye oku navagwana nokota odo. Varugani navenye hawe navagwana mauwa gawo, mukwatelimo gokampan Volker Paulsmeier yimo ngoso ana kutanta. Age simpe katente asi oyo vana gwana kepangero kuna kara yokaruwogona eyi vana kumona asi kapi nayitwara kampani ezi komeho oko tunayuka nosiruwo nasinye. Egano lyetu ose kwahundilire 10 000.
Nye awo kampani kunakuturapo magano gomape. Ose kuna hafa unene kweyi lina rugana epangero omu lina reta eparu mwetu. Ngesi kapi natukapata hena mavango getu. Edi nokota tuna gwana hawe nadikwata siruwo mokuyiwapayika, nomu tuna kugazara asi tatukatjindja ngendeseso zetu, nokutara asi varugani vahepa nawo kumoneka melikwamo eli lyokutjindja mukaro gokampani,’’ yimo ana kutanta Paulsmeier. Eyi twarugana nomvhura nadinye ose kuzangura pilchard omu atutura mafano gado, muna hamene Lucky star ntani Glenryck South Africa.
Etosha kwanana noudigu, kutunda tupu mo 2015, morwa nomfi edi do pilchards kwasesupa, eyi yatwaredera dogoro vahagekese kukwata nomfi edi do pilchards mo 2018.
Paulsmeiere katenete asi awo kwavaninkisa nye vambesitere pilchards koMorocco yipo asi kampani zawo zitwikire. Kutunda tupu nye opo zahaga pilchards mo 2017, Etosha kwatameka nye kupapara magano nkenye nokudiva asi ngapi navaza komeho, mokukeverera varuganai vawo ntani evango nalyo lirugane, omu nye vatamekere kumbesitera pilchards ponze zosirongo.
Omu nye yavagumine mokureta yiwizamo oyo, noyiruganeso yayo, eyi kapi yina kara hena mulyo asi kuvhura kutwara kampani ezi komeho. Kampani makiura yipo zatameka asi vahepa kuhagekesa varugani vawo vamwe, elikwamo eli lyatamekere ketameko tupu lyomvhura ezi. Paulsmeier yimo ngoso ana kufaturura.