Ngoloneya woshitukulwa shaTjozondjupa okwa popya ta ti okwa hafa okutumbula nghee omwaalu wovanhu va mona oixuna ve li 5 758 va mona ekwafo loikulya.
James Uerikua pefimbo a li ta yandje omushangwahokololo, okwa popya kutya ovakufimbinga vomeni nokondje yoshitukulwa ova kala omutumba nokulongela kumwe opo va hange efindano lokutofa mo oikandjohoololo iheyali ya mona oixuna kondjala, opo i vatelwe nomakutu oikulya.
Uerikua okwa yelifa kutya oshitukulwa oshi na omwaalu wovanhu vahapu tava mono oixuna nevatelo e li va pewa kali shi lela liyamba, okukwafa ashike apa tava dulu.
Ovakufimbinga natango ova yandja oushako voikulya kovanaudu vokoshipangelo shaTsumkwe ava ve li kepango lomukifi wo-TB oshoyo Multi Drug Resistance.
Ngoloneya okwa twikila kutya natango oimaliwa ya fika poN$398 945.90 oya vatela omwaalu wovanhu ve li 84 va kanifa eemwenyo davo oshoyo ovanaulema. Ovanaulema ova vatelwa okupewa omayambidido ngaashi outemba vokukala omutumba naikwao ya wedwa po. Oonakufya ova ningilwa omalongekido omapako unene tuu ava ve na ovakwenidimo itava wanifa oimaliwa yokupaka.
Oministeli yomayambulepo eedoolopa nomikunda nayo oya vatela ovakalimo vomOtjozondjupa. Uerika okwa tumbula kutya oministeli oya yandja eepoloyeka da kosha N$862 958.33 di futile ovakufimbinga vomangeshefelo opedu, ovanafaalama vokomikunda oshoyo eyandjo loikulya kovakwashiwana.
Elalakano leepoloyeka edi okuvatela ashike ovakwashiwana opo va kale ve lipyakidila nasha, oshoyo okumona oshimaliwa shokulivatela, Uerikua ta tumbula.
Ombelewa yangoloneya natango nayo oya yandja omayambidido kovakwashiwana ngaashi okufutila ovanafikola vavali elihongo lopombada. Ombelewa oya vatela natango ovanhu ve li 12, ovo va dula okulimonena omwaalu womayovi ahamano keshe umwe a dilila medeulo lounafaalama weexuxwa. “Ombelewa natango oya vatela okulongifa imwe yomoyeendifo yopolifi oshoyo oipangelo kongushu N$100 000,” Uerikua ta tumbula.
taimihaihambo@gmail.com