OSHAKATI – Ngoloneya gwoshitopolwa aoshana, Elia Irimari okwa ti omolwelongelonkumwe lyomalelo ga yooloka moshitopolwa shaShana, iimbuluma oya shuna pevi.
Irimari ta ti, nonando iimbuluma ya yooloka ya kala tayi holoka moshitopolwa okuza omimvo dha piti, omumvo nguka oya shuna pevi lela.
Ngoloneya ndhoka okwa li e dhi popi ta ulike enyanyu sho ehangano lyomalusheno mOshakati, Oshakati Premier Electric lya li lya tameke okwaandjaneka omalusheno kOnawa Extensions 7 oshowo 8. Omukuluntu gwopolisi moshitopolwa shaShana Naftal Lungameni Sakaria sho a li a yi moonkundatha noshifonkundaneki shika kombinga yiimbuluma oomwedhi dha piti okwa ti, okwa nyanyukwa kiimbuluma mbyoka ya shuna pevi moshitopolwa nonando aalongithi yoondjila taya tsikile okukonda oompango omanga kwa li ya londodhwa.
Omiyalu dha gandjwa petameko lyomumvo nguka otadhi ulike kutya aalongithi yoondjila ye vule po70 okwa li ya mangwa omanga ye li 1 924 ya li ya pewa uutekete molwokulongitha nayi oondjila oshowo okwaagwanitha po oompango dhomoondjila. Uutekete awuhe kumwe owu na owongushu yoN$1 885 925. “Otwa kala nokulondodha aakwashigwana okupitila miikundaneki ya yooloka oshowo okugandja omalongo moshigwana nkene si na okwiihumbata okuyanda omaupyakadhi niiponga yomoondjila,” ta ti ngaaka. Aalongithi yoondjila oya kala wo nokulondodhwa kaaya hinge ye li kohi yiikolitha oshowo ya simaneke omandhindhiliko gomoondjila okukaleka po elandulathano moondjila.
Aapolisi otaya longo nuudhiginini okukalekapo oshowo okukwashilipaleka kutya ayihe mbyoka oya landulwa nokusimanekwa.
“Mboka taya mangwa oomboka taya kondo oompango, ngaashi kwa li naana ya londodhwa,” ta ti ngaaka.
Mboka ya li natango taya kwatwa po, aashingithi momahala gomanwino, sho taya kondo oompango oshowo ethimbo lya pitikwa komikanda dhawo dhokushingitha.
“Otatu lopotelwa omagumbo taga teywa mpeya naampeya, nuunene momindhingoloko dhomoondoolopa.
Aapol isi otaya tsikile okupatolola omapandaanda oshowo okuhadha oohauto pethimbo lyuusiku,” ta ti ngaaka.
Ta ti, elalakano okukaleka po ombili nelandulathano moshitopolwa shaShana onkene otaya tsikile okulonga nokugamena oshigwana naakalimo yawo.
vkaaapanda@nepc.com.na