ONGWEDIVA – Fillemon Shigwedha omunamido 28 naPhilips Immanuel ovo ve na oulema wa yooloka, ova hokolola nghee oipangelo ye va imba vaha mone ofilinga yavo youlema kepengelo yokomwedi.
Ovalumenhu ava pauhandimwe ova holola eudonai lavo, molwaashi vati va anyenwa eembapila tadi kwashilipaleke kutya otava pumbwa
eyambidido molwonghalo youlema.
Shigwedha okwa hokolola kutya yee okwa kala noulema weenyala nomaoko oule weedula 28. Ta ti onghalo yaye oye mu fininika a ka konge ombapila koshipangelo shaNandjokwe, ye e i twale kombelewa youkashikekookanhu, opo a kale ta pewa opendjela.
Ashike eshi a ya mokanduda komakonakono, ndokotola vati okwe mu lombwela a yukililife omaoko aye. Eshi a ninga osho a lombwelwa, ndohotola vati okwa ti oku li nawa ina pumbwa opendjela. “Ame kandi na eshi handi dulu okulonga omolwoulema ou ndi na weenyala nomaoko. Ihandi dulu okuhumbata ile okulonga oilonga tai pula eenghono shaashi eenyala dange kadi na eenghono, oda lemana okudja pedalo,” Shigwedha ta tumbula. Okwa twikila ko kutya yee ke na eshi ha longo, oku li ashike meumbo navamwaina vavali natango navo ve na
oulema. Vati ohava kendabala okulima mepya opo va dule okulya, ashike mepya ihamu di sha shiyamba shaashi omaoko avo aveshe kae na eenghono.
“Ohandi indile epangelo li kwafe nge apa tali dulu, opo ekemo lange li udike. Onda hala yo oondokotola va huxulife po onghalo yokulikufa ovanhu, nokuhatula onghalo younhu womunhu moilonga,” Shigwedha ta tumbula.
Immanuel oo ye e na oshipa shitoka okwa hokolola kutya okwa wanifa eedula 19 ashike fiyo opaife iha mono opendjela yaye yokomwedi. Okwa ti eshi a ya koshipangelo shaShakati a ka tale ombapila tayi ulike oulema waye okwa lombwelwa kutya naye kOvenduka. “Ame kandi shi kutya kOvenduka ohandi ka tala ko shike shaashi oulema wange ou li kombada ame kandi na oimaliwa yolefa,” Immanuel ta ti.
Okwa twikila kutya yee eshi a shuna koshipangelo oshikando shitivali, vati okwa lombwelwa kutya ndokotola ke mo, ashike yee okwa mona kutya omo e li moshipangelo vati.
Immanuel okwa popya yoo kutya yee eshi ina shangifwa opendjela okudja pedalo, ovakulunhu vaye ove mu fiya po manga okahanana. Okwa twikila kutya okwa kala eli mefiloshisho tali shongola, nonghee onghalo oye mu fininika opo a ka konge omakwafo vati apa ta dulu ndele ita vatelwa. “Onda hala okudimbulukiwa ngaashi ovanhu aveshe ve li monghalo ya fa yange shaashi ohandi mono unene oixuna,” Immanuel ta tumbula. Omupopiliko woministeli youhaku Walters Kamaya okwa ti oondokotola ohava yandje ashike omanyamukulo e likolelela konghalo yomunaudu.
Okwa twikila yoo kutya oulema womunhu oo hau holola ngeenge omunhu ota dulu okupewa opendjela ile ita dulu. Natango ngeenge omunhu okwe lihange monghatu a tuminwa konhele i li kokule naapa ha di, oministeli ohai yandje oyeendifo yoshali opo omunhu a twikile nomakonakono aye.