Elelo lodoolopa yaNgwediva ola yambidida ovanafikola noikwafifo yomaudano i li pongushu yoshimaliwa shi fike poN$7 000-00.
Ovanafikola 42 va dja keefikola da yooloka moshitukulwa shaShana ova pewa omatanga nosho yo oikwafifo ya yooloka youdano wobasketball oshivike sha dja ko.
Moshipopiwa shaye omupedupmayola wodoolopa yaNgwediva Ulalia Katonyala okwa ti omaudano okwa fimana kovanafikola shaashi eshi otashi yandje omhito kovanafikola opo va kale tava longifa ounongo wavo tashi pitile mokukufa ombinga momaudano.
Okwa weda po ta ti otashi kwafele yoo vali okukelela ovanafikola vaha hepife ounongo wavo.
Katonyala okwa ti muni waNgwediva okwa didilika ovanafikola va taalela omashongo oikwafifo yomaudano ngeenge tava ka ninga omadeulo.
Onghee naashi osha eta opo muni a yambidide ovanafikola opo va twikile nomadeulo avo nosho yo okukala ve na omukumo nondjungu pefimbo lomadeulo.
“Ohatu twikile nokuyambidida ovanafikola moinyangadalwa yomaudano opo tukale ke po omaudano modoolopa yetu,” ta ti.
Omudeuli woudano wobasketball ha deula ovanafikola, Pondo Naulenge okwa pandula muni waNgwediva eshi a yambidida ovanafikola noikwafifo.
“Ovanafikola paife otava ka longa noupu pefimbo tava ningi omadeulo shaashi ova mona oikwafifo ya wana,” Naulenge ta ti.
Okwa ti okwa li ve li momhumbwe yomatanga inaa wana omanga omatango amwe okwa kulupa.
Naulenge okwa ti oha deula ovanafikola veendodo da yooloka okudja ondodo onhi-3 fiyo 12.
Okwa weda po ta ti ovanafikola ohava deulilwa kokapale koshipupudilo sho-VTC mOngwediva konima yeetundi.
“Ovanafikola otava ka kufa ombinga yomakondjifafano oudano wobasketball koitukulwa ya yooloka,” ta ti.