Kansela woshikandjohoololo shEengodi Protasius Neshuku okwa ti nonande epangelo la ninga eenghendabala dokutunga eemboola domeva, omhumbwe yokuhe na omeva mayela onghee natango tai twikile moshikandjohoololo shaye.
Neshuku okwa ti natango onghee ngoo ovakwashiwana tava ende oinano ile tava ka teka omeva okunwa komifima molwaashi omeva omeemboola odo va tungilwa kepangelo omalula.
Meenghundafana a ninga naKundana Neshuku okwa hokolola ta ti omhumbwe yomeva oyo unene otai dana onghandangala moshikandjohoololo shaye shaashi osha didilikwa shi na omikunda dihapu dihe na omeva okunwa a yela.
“Oshiwana oshi na omhito yokukwatwa komikifi da yooloka molwaashi hashi nu omeva a kaka,” ta ti.
Ovahangifikola hava longo keefikola da yooloka moshikandjohoololo Eengodi otava nyenyeta tava ti ova lulilwa konghalo yomhumbwe yomeva peefikola davo.
Onghee naashi ohashi eta opo va ka longele keefikola dimwe oku ku na onghalo i li xwepo yomeva.
Lusia Taapopi omukalimo momukunda Evale okwa ti oomeme ve li momateelelo ohava ende oshinano shile tava ka konga omeva keendungu omanga vamwe ohava ka teka komifima nounona vavo meedikwa.
“Omafimbo amwe komifima ohaku kala ovanhu va ngudumana ve li momukweyo ve uya okuteka omanga vamwe ohava kala tava xwiile oimuna yavo. Onghee ohatu kala ketambi efimbo lile twa teelela ovanhu ava va fika tete va mane okuteka nokuxwiila oimuna yavo,” Taapopi ta ti.
Omukulunhu mombelewa yoshikondo shokuyandjaneka omeva moshitukulwa shaShikoto Steven Tuukondjele okwa koleka ta ti omhumbwe yomeva inai kuma ashike oshikandjohoololo Eengodi.
Okwa ti oikandjohoololo ngaashi Nehale lyaMpingana nOkankolo nayo oya kumwa komhumbwe yomeva molwaashi mu na oshiwana hashi teke meendungu nomomifima.
Tuukondjele okwa ti epangelo ola tunga eemboola mbali omudo wa dja ko moshikandjohoololo Eengodi ashike odi na omeva alula.
“Ouministeli wounamapya owe lipyakidila okukala wa kandula po omukundu weemboola di na omeva alula,” Tuukondjele ta ti.
Okwa weda po ta ti omhumbwe yoshimaliwa shomutengenekwafaneko osho shimwe shi li eshongo linene la taalelwa kouministeli wounamapya opo u dule okuyandjeneka omeva a yela moshiwana.