Okamatyona keedula 15 vati oka monifa omunafikola mukwao oshiponga eshi ke mu twa nomukonda monhulo pefimbo kwa li tava tanguna. Oshiningwanima eshi osha ningilwa kosekundofikola Augustineum Secondary School moWindhoek oshivike sha dja ko.
Nakuninga oshihakanwa nomufekelwa aveshe ove li mondodo onhi-8. Omupedukulunhu Leevi Ileka wopolifi yoshilando okwa hokolola ta ti omufekelwa okwa tameka okushinda mukwao vati te mu pula kutya omomwashike a kululwa nai. Okudja opo okwa tameka ta undula nakuninga oshihakanwa.
Pefimbo olo loikolokosha omufekelwa vati okwa kufa onghonda nokutwa mukwao.
Nakuninga oshihakanwa okwa twalwa koshipangelo shaKatutura opo a ka mone epango lomeendelelo. Ileka ta ti omunafikola ou paife oku li monghalo i li xwepo.
Opolifi oya hokolola tai ti kamatyona nakumonifa mukwao oshiponga okwa li ka kwatwa po tete, ashike konima oka mangululwa. Kape na oshibofa sha patululwa.
Oshiningwanima shikwao, okamatyona keedula 19 otaka kongwa kopolifi mekwatafano longhendabala yedipawo omo vati ka tetaula nomakatana omulumenhu womido 29. Oshiningwanima eshi osha ningilwa keendingosho momukunda Omale moshitukulwa shaShana efimbo loufiku.
Otaku hokololwa kutya nakuninga oshihakanwa okwa tambulilwa moshipangelo shaShakati e li monghalo itai nuwa omeva. Omupopiliko wopolifi moshitukulwa shaShana Inspector Thomas Aiyambo okwa hokolola ta ti ovalumenhu ava okwa li tava tanguna pefimbo kwa li tava nwine omalodu pamwe.
Opolifi oya hokolola tai ti ovalumenhu ava ova li va hanunwa kovakwashiwana ovo va li keendingosho nokonima omunamido 29 okwa ya keumbo a ka nangale.
Vati lwopotundi 01h00 okamatyona oko komido 19 oka kufa ekatana nokuya keumbo lanakuninga oshihakanwa noku mu tetaula nomakatana oikando ihapu.
Omufekelwa vati okwa faduka po konima eshi a longa oshimbuluma, onghee ota kongwa kopolifi.
Opolifi otai ndile moshiwana kukeshe ou e na ouyelele u na sha naapo pe na omufekelwa ou opo a lopotela opolifi diva. Oshiningwanima shikwao, omulumenhu weedula 24 okwa kwatwa eshi vati a denga mumwainamati nomamanya noku mu ningila omatilifo kutya ote mu dipaa. Oshiningwanima eshi osha ningilwa meumbo lavo momukunda Omadhiya moshitukulwa shaMusati.
Opolifi oya hokolola tai ti nakuninga oshihakanwa nomufekelwa okwa li tava tanguna naashi osha ka eta olwoodi pokati kavo. Omakonakono opolifi otaa twikile moibofa aishe yonghendabala yedipao.