Oosikola ndhoka dha li dha pata mOshitopolwa shaHangwena omolwomeya gefundja odha patuluka.
Omupopiliko gwelelo lyoshitopolwa shaHangwena Silas Nepembe okwa ti oosikola dhi li 29 ngashiingeyi odha patuluka.
“Oosikola ashike dhi li 30 kwa li dha pata, nopwa kala ashike Shingunguma Primary ndjoka natango ya taalela uupyakadhi womeya,” ta ti ngaaka.
Ta ti, nonando omeya taga ende gu uka pevi, osikola ndjoka Shingunguma Primary oya ndhingolokwa komeya onkene inayi patuluka.
Omukuluntu gwelongo moshitopolwa shaHagwena Isak Hamatwi okwa ti, nonando aalongwa ya kala yel i komagumbo ethimbo ndyoka lyomeya, kape na nando esiku limwe tali ka hepa.
“Oosikola odha gandja omatokolo kutya otadhi ka longitha ethimbo lyomafudho oshowo omasiku gowala ya longe aanona okufutila po omasiku ngoka ya kala komagumbo,” ta popi ngaaka.
Ta gwedha po kutya oosikola dhi li 14 inadhi yelitha natango kutya elandulathano lyawo olyi li ngiini, okuza mefudho ndyoka lya li lye ya po omolwomeya gefundja.
Ta ti, aalongwa ye li 11 635, naalongi ye li 494 oya li ya ningwa iihakanwa yefundja moshitopolwa shaHangwena.
Aantu mboka ya li ya tembudhwa komagumbo oye li natango kootenda omolwomeya inaaga pwina mo thiluthilu nenge omagumbo inaaga kasha nawa.
Oshitopolwa shaShana nasho osha pititha kutya oosikola ndhoka dha kala dha pata otadhi ka tsikila nootundi ethimbo lyefudhho oshowo momasiku kaage shi gosikola, uuna omeya ga shuna.
Ndhoka okwa li dha popiwa komunambelewa omukuluntu gwelongo, koshikondo shomathaneko nomayambulepo, moshitopolwa shaShana Fenni Mwiila, sho kwa li ta gandja uuyelele kombinga yomeya gefundja oshiwike sha zi ko.
“Shoka otashi ka ningwa okufutila po omasiku ngoka aanona ya kala ye li momagumbo, oshoka aanona oya kala po miilongwa yawo,’’ ta popi ngaaka. Ta gwedha po ta ti shoka sha kalitha po aanona omanga ye li komagumbo, osho kaapwa li pe na nkene aalongwa mboka taya vulu okupewa omalongo okupitila moonkambadhala dhilwe.
Mwiila okwa totha mo kutya oosikola dhi li 12 okwa li dha pata mOshitopolwa shaShana ihe dhi li heyali ngaashingeyi odha tameka nootundi.
“Aanona ye li 3 119 okwa li ya kalekwa komagumbo, ye li 1 836 oya tameke okuza petameko lyoshiwike sha zi ko omanga ye li 1 283 natango ye li komagumbo,” ta popi ngaaka.
Ta gwedha po ta ti, mboka ya tameke osikola oomboka omeya ga shuna pevi momindhingoloko dhawo, omanga mboka ye li komagumbo ya tegelela omeya ga shune pevi.
Okwa popi wo kutya onkalo yomeya otayi ende yu uka pevi, noosikola odhindji odha tegelelwa dhi kale dha tameka nootundi.
Okwa kumagidha wo aakuluntu ya tsikile okusila aanona oshimpwiyu oshowo oku ya kumagidha kaaya dhane omeya, okuyanda omaso gomeya.
Ta ti, oosikola sho dha tameke, itashi ti omeya oga ya, aanona naya thindikilwe nokutegelelwa okuza koosikola.
Okakomitiye taka ungaunga nefundja moshitopolwa shaShana oka pititha kutya onkalo yomeya gefundja otayi ende tayi hwepopala, ashike kiikandjohogololo yimwe natango omeya otaga tondoka.
vkaapanda@nepc.com.na