Ohamba yOukwanyama meekulu Martha Mwadinomho yaKristian Nelumbu okwa ti oshiwana ohashi mu udifa nai ngeenge shihe na ombili.
Ohamba Nelumbu tai ti oya hala ombili i kale tai pangele melelo laUkwanyama, ovanhu tava longele kumwe nokutopolelafana omayelele momikunda.
“Ihandi kofa vali nawa shaashi kamu na ombili momikunda.
Otamu etele nge ohonde ya londa ngeenge kamu na ombili,” mekulu ta ti.
Onghee okwa ti ina hala vali oku uda ovanhu tave lidenge ile ovaleli vopamufyuululwakalo tava kondjele omadu noshoyo oipundi yokulela.
Edi ohamba oye di popya pefimbo kwa li tai ulike elenga lipe lakula loshikandjo Ohakafiya Omaandaxa, komukunda Ohakafiya moshitukulwa shaHangwena.
Oshikandjo shaHakafiya osha mona elenga lipe konima eshi ohamba yaUkwanyama ya ulika Ndemudina Nghifikepunye Ndove a ninge elenga lakula loshikandjo shaHakafiya.
Oshikandjo Ohakafiya oshi li koshi yelelo laUkwanyama osha aluka konima yeedula 10 eshi kwa li sha kufwa po onghee naashi osha kala sha eta eenhamanana noshiwana shihe na ombili oule wefimbo lile.
Otaku hokololwa kutya ovakalimo vomOhakafiya ova kala nokutwala elelo laUkwanyama keendudu noshoyo komhangu ya kula mOshakati tava pula oshikandjo shavo shi aluke.
Ovakwashiwana ova kala vehe na ombili omanga vamwe ohava kala tava kondjele okulela oshikandjo noshoyo okulipa omikunda inava pewa epitikilo kelelo. Ombelewa yohamba yaUkwanyama oye shi pondola okukala ya kandula po oupyakadi weenhamanana odo kwa li di li moshikandjo shaHakafiya konima eshi kwa li oshiwana sha handuka shaashi oshikandjo shavo sha kufwa po.
Omudo 2010 elelo laUkwanyama okwa li la kufa po oshikandjo Ohakafiya eshi kwa li sha topolwa moikandjo ivali, Oshikunde nEenhana.
Onghee vati okudja opo eshi okwa li sha eta ovakalimo va dja momikunda di li moshikandjo shaHakafiya va kale va handuka nova kale alushe tava pula opo oshikandjo shavo shi aluke.
Ohamba Nelumbu oya yelifa tai ti elalakano opo ombelewa yaye i kale ya alula oshikandjo Ohakafiya okukaleka po ombili moshiwana.
“Osha fimana ngeenge oshiwana shi na ombili. Kaleni nombili oshiwana shange moshikandjo sheni,” ta ti.
Okwa weda po ta ti oovene vomikunda nava kale ve na eembapila dokulela omikunda di li pambelewa.
Moshipopiwa shaye omunashipundi welelo laUkwanyama Eliaser Waandja okwa kunghilila oshiwana opo shi haumbate oilwifo ngaashi eembele, omikonda, omakatana neendjebo ngeenge tashi ka nwa omaongo.
“Osha nyika oshiponga ngeenge omunhu a nwa omaongo e na oshilwifo shaashi omunhu oha kala a kwatwa komhepo yokulonga oshimbuluma unene tuu ovanhu ngeenge tava tanguna,’” ta ti.
Moshipopiwa shaye elenga lipe loshikandjo Ohakafiya Ndemudina Nghifikepunya Ndove okwa ti otaka longela kumwe noshiwana noshoyo okukala a pula omayele komalenga makwao.
fhamalwa@nepc.com.na