Nonando nuumvo aanafaalama yomomapya oya li ya longo nuudhiginini omapya gawo, oyendji oyi ikwata pomutima sho omvula ya tula mo ombiliki, yo yamwe oye na nale iilya ya kungululwa po kefundja.
Aanafaalama ya yooloka monooli oya popi nkene omvula tayi shololitha, taya ti, ethimbo otali ende lya uka komeho ihe omata itaga dhenge pevi.
Taya ti, oya kala ye na eyinekelo kutya omvula onayi ka loka ngaa komasiku gokomeho, ihe omasiku oga piti owala inaayi loka.
Kaunapawa Shigwedha gwomomukunda Onampinda okwa ti, oya li ya tokola okulonga omapya gawo nuumvo ihe omvula oya huulile ondjilakati, nonando omvula ya li ye ga dhenga pevi petameko lyomvula.
“Nuumvo okwa li tu na omukumo kutya otu na okulonga omapya getu, opo tu vule oku ka kutha mo natango iilya yokulanditha, tu vule okwiihupitha moomvula dha landula ko,”
Shigwedha ta ti ngaaka.
Ta gwedha po ta ti, oya hepeka iimaliwa yawo yokupulula, oshoka iilya paife otayi ende tayi si ko mutenya.
Ta ti, omutenya otagu nanene, ogundji unene ihe kegulu itaku gandja nando oonkondo. “Otwa longitha N$1 800 okupulula epya alihe. Ondjala nuumvo okwa li tu shi otwe yi thanga omuthi, oshoka okwa li twa tokola okulonga,” ta popi ngaaka.
Timoteus Timoteus gwomomukunda Ondjondjo kOkatana okwa ti, natango oku na omukumo kutya omvula otayi vulu okuloka. Ta ti ombinga yimwe yepya lye iilya oya li kohi yomeya gefundja, ihe paife omeya oga ya. “Iilya mbyoka ya li inaayi nyengwa komeya nena otayi ende tayi kukuta komutenya oshoka omvula oya kala ko,’’ ta popi ngaaka.
Ta gwedha po ta ti, nonando omvula okwa li ya hanagula po iilya yawo yimwe nomeya gefundja, otaya indile yi galuke opo yi hupithe iilya mbyoka ya hupa po.
Soini Samuel gwomomukunda Epyeshona okwa ti aanafalama yomomapya oya pumbwa okwiigilila onkalo yombepo kutya oya lunduluka.
“Ethimbo ndyoka lyonale kwa li haya landula okulonga omapya gawo, halyo we lyongashiingeyi. Omvula yopaife ohayi ya unene petameko lyaMaalitsa,’’ ta popi ngaaka.
Oku na omukumo kutya omvula otayi ka loka natango, ta ti, aanamapya inaya sholola.
Ta gwedha po ta ti, omagalikano naga tsikile ashike, oshoka Pamba oha gandja mpoka ta indilwa.
“Iilonga yaKalunga iinene, ethimbo lyomuloka inali kuka natango. Inandi itaala kutya nuumvo oku na ondjala nonando ondi uvite kiitopolwa yimwe ku na iilya ya sa niimuna tayi si ondjala,” Samuel ta ti ngaaka.
Ta ti, omvula ngele oya loko miiwike tayi ya, otashi vulika iilya yimwe yi hupe.
Samuel ta ti, ope na natango omagumbo gamwe momukunda gwawo ge na iilya tayi ende tayi si po komutenya omanga yimwe ya kungululwa po komeya. Festus Shaanika gwomukunda Onkani okwa ti, epya lye inali pululwa nuumvo, oshoka okwa kala a tegelela omuloka omuhwepo opo a vule okupululitha. “Shika onda kala nde shi tegelela nale, omvula yotango sho ya loko, okwa li ya shololitha ndje. Kakwa li nda pulula, onda li nda mono kutya otandi hepitha oonkondo dhandje niimaliwa,” ta popi ngaaka.
Ta popi ta ti, nonando omvula okwa li ya loko nawa mokati kaJanuali, shoka kakwa li sha enditha omwenyo gwe oshoka okwa kala e shi shi kutya otayi ka mwena po. Ta gwedha po ta ti, shika osha kala tashi holoka omimvo ndatu dha piti paife.
“Omvula ombwaanawa ohayi ya kohugunina,” ta ti ngaaka.
vkaapanda@nepc.com.na