Omanga aanamapya yamwe taya nyenyeta omapya gawo ga yonagulwa po komeya gefundja miitopolwa Oshana, Omusati noHangwena, aakalimo yokoshitopolwa shaShikoto otaya nyenyeta omapya gawo noongumbu dha yonagulwa po koondjambo ndhoka dha iyaka mEtosha.
Uuministeli womindhingoloko oshiwike sha ziko owa popi kutya okwa li wa longitha oomilliona ondhindji omimvo ndatu dha piti okufuta omapya gaantu ga yonagulwa kiiyamakuti.
Oshiwike shazi ko oondjamba odha kala nokulopotwa tadhi hanagula omapya noongumbu dhaantu moshitopolwa shaShikoto, unene momukunda Onalusheshete.
Aakalimo moshitopolwa moka otaya nyenyeta kutya oye na uumbanda oshoka oomwenyo dhawo nadho odhi li moshiponga. Ta ya ti, omanga uuministeli womindhingoloko ihauka ninga po sha nande ona ya lopote.
Taya ti, uuministeli ohawu futu nuudhigu ngele omaliko gwawo ga yonagulwa po kiiyamakuti.
Uuminiusteli womindhingoloko owa koleke kutya, oondjamba ndhi li heyali okwali dha monika moshitopolwa moka.
“Aanambelewa yanatiili oya kala momundhingoloko moka taya shiike yo tala onkalo yomaliko ngoka ga yonagulwa. Omapya noongumbu odhindji odha yonagulwa shili koondjamba,” omupopiliko muministeli womindhingoloko Romeo Muyunda ta ti ngaaka.
Ta ti, oondjambo ndhoka okwali dha tengenekwa dha ziilile kombinga yokOkavango gokuuninginino, hoka natango dha shuna.
Ta gwedhapo ta ti, shika hasho oshikando shotango, iiyamakuti ohayi ende tayi kongo uuhupilo omolwa ondjala nenota.
“Ota tu kumagidha oshigwana shi gandje ompito kaanambelewa opo ya longe iilonga yawo, ihe hakwiikuthila ooveta momake gawo,’’ ta kumagidha ngaaka.
Ta ti, oshigwana nashi longithe oompito adhihe okugamena omahala gawo kaaga ponokelwe koondjamba.
Muyunda ta ti, ngele aanambelewa ya mana nomakonakono, okugongela uuyelele awihe, otaku ka pitithwa omushangwa opo kufutwe shoka sha yonagulwa koondjambo ndhoka.
Uuministeli womindhingoloko owa pititha omushangwa kutya owa longitha oshimaliwa shi thike poomilliona N$24.1 okufuta ekanitho lyoomwenyo oshowo omayonagulo niiponga ya etithwa kiiyamakuti moshilongo.
Muyunda okwa popi ta ti, owa longitha oomilliona N$24.1 okuza ashike momumvo 2019 sigo onuumvo.
“Momumvo 2022 oomwenyo dhaantu dhi li 15 odha faalelwa kiiyamukuti omanga mo2023 dhi li mbali dha kana omolwiiyamukuti. Aantu ye li 54 oya ehamekwa nokumona iiponga,” ta ti ngaaka,
Ta ti, muule woomvula dhoka uuministeli owa futu oshimaliwa shi thike N$2 963 852 shiimuna ya lika po kiiyamakuti, oshowo oshimaliwa shi thike N$2 569 200 shomapya ga yonagulwa kiiyamakuti.
Ta gwedha po ta ti, natango uuministeli owa longitha oshimaliwa shi thike N$640 000 okufuta iiponga ya ningilwa aantu oshowo oshimaliwa shi thike poomilliona N$3 shoomwenyo dhaantu ya dhipagwa kiiyamakuti.
“Natango oshimaliwa shi thike N$14 695 110,00 osha li sha futwa komahala ga gamenwa ga yooloka omolwuupyakadhi hau etwa kiiyamakuti,” Muyunda ta ti ngaaka.
Ta gwedhwa po ta ti, okuza 2019 oohekita dhi thike 2 637 dhomapya odha halakanithwa kiiyamukuti, uunene koondjamba, omanga okuza pokati komimvo 2022 no2023 oohekita 330 odha li dha hanagulwapo.
Muyunda ta ti, iimuna yi li 862 oya lika po kiiyamakuti okuza 2022 sigo 2023.
“Uupyakadhi wekanitho lyoomwenyo oshowo ehanagulepo nemonitho lyiiponga kiiyamakuti onkene tau tsikile. Shoka hashi tula oonkalamwenyo dhaakwashigwana moshiponga,” ta ti ngaaka.