Aakalimo yomolukanda Pohamaba mOshakati oya ti, omanga ya lombwelwa kutya itaya ka tembudhwa ngaashi omalukanda omakwawo, oya hala omayakulo agehe ngaashi yakwawo ye ga pewa.
Ta ya ti oya hala omeya nolusheno popepi ngaashi yakwawo ya ningilwa mboka ya tembudhilwa kOnawa.
Sirka Shiyagaya okwa ti omayakulo ngoka oga ningilwa ashike ombinga yimwe yolukanda lwawo.
“Otwa hala natse tu kale tu li momahala ga tendwa nawa, ge na omeya nolusheno,’’ ta ti ngaaka.
Cornelia Thobias gomolukanda Pohamba okwa ti, kaye na nando uupyakadhi wokwaatembudhwa, shampa ike elelo yondoolopa tali ya etele omayakulo popepi.
Elelo lyondoolopa yaShakati olya kala nokutembundha omalukanda, notali tsikile okutembudha gamwe ngoka ga hupa ko, ihe olya kwashilipaleke kutya, olukanda lwaPohambo italu ka tembudhwa.
Mayola gwelelo lyondoolopa yaShakati Leonard Hango okwa ti elalakano lyokutembudhila omalukanda kombinga yimwe, kOnawa, okuhumitha ondoolopa komeho oshowo oku yi tula pomuthika goondoolopa oonkwawo.
“Otwa tembudhila nale omalukanda ga thika pugane kOnawa, ihe natango otu li metifa okutembudhila olukanda Oshoopala kOnawa, ndoka lwa tseyika nawa nedhina “Ankambya”.
Ta ti, nonando mboka ye li ko otaya nyenyeta kutya inaya hala olukanda ndoka lu tembudhilwe popepi nayo, oshoka olu na oombudhi odhindji, oya ningi onkambandhala oku shi ninga, nomayakulo galwe ga gwendhwa po.
“Otu li metifa okufaula ko osasiona yopolisi oshowo okapangelo komakwatho gotango.
Opate ndjoka ya hulila ondjilakati otayi ka tsakanena, opo tu ete omayakulo popepi naakalimo,” Mayola ta ti ngaaka.
Ta gwedhwa po kutya olukanda Pohamba olwa tulwa nale olusheno kombinga yimwe oshowo omeya.
Mayola ta ti, okwa hupu ashike omagumbo ngoka taga ka ukililithwa opo ga kale ge li melandulathano ngaashi omalukanda omakwawo ga tembudhilwa kOnawa.
“Kape na ngoka taka ta tembudhwa, ihe otatu ka tula omagumbo momalandulathano noku etelwa omayakulo popepi,” ta ti ngaaka.
Omukalimo gokOnawa Maria Shikulo okwa ti, oye li komahala gawo yu uvite ombili, kaaye na uupyakadhi notaya ningi oongeshefa dhawo pomahala gawo yene, kaape na omapiyagano gasha.
“Otatu pandula elelo lyondoolopa sho lye tu ningile omauwanawa ga tya ngeyi, nonando twa ningi ethimbo twa taalela omaupyakadhi goothina komalukanda hoka twa twembundhilwa,” ta pandula ngaaka.
Shikulo okwa ti, ngele owa pewa ompito yokutembudhilwa kOnawa inoyi tinda, oshoka oto iyimbi uuwanawa.
vkaapanda@nepc.com.na