Presidente Nangolo Mbumba okwa ulike iilyo ine opo yi kale oshitopolwa shokakomisi koBoundaries Delimitation and Demarcation Commission (BDCC) okatitano.
Okakomisi koBDCC oke lile po omatopolo goongamba pokati kiitopolwa osho wo okuluka iitopolwa, iikandjohogololo noondoolopa.
Pethimbo a ulike iilyo yokakomisi mEtitatu, Mbumba okwa ti okakomisi otaka ka ninga omapekapeko nokutalulula ngele oongamba pokati kiitopolwa niikandjohogololo otadhi pumbwa oku lundululwa nenge ndhoka ndili po ngashingeyi odhi li nawa.
Ta ti iilyo yokakomisi oyi na oomwedhi ndatu oku pondola po sha omanga omahongololo inaa ga thika, niilonga yako otayi ka kwathela okakomisi komahogololo opo ka shangithe aahogololi noku ya tula kiikandjohogololo hoka ye na okukala.
Mbumba ta ti epangelo sho lya ndhindilike kutya omiyalu dhaantu moNamibia odha adha poomiliona ndatu, okakomisi oka tegelelwa opo ka ete po uuyelele wu na oshilonga, wa etithwa kelunduluko mekoko lyoshigwana, shoka nokuli shi na aagudjuka oyo oyendji.
“Epangelo otali ka wilikwa kiilonga yokakomisi moku eta po omalunduluko nomilandu dhoku yamukula omashongo. Onde mu pe mu tameke oshinakugwanitha shika kaapu na eongaongo, ne mu shininge nondjungu mu shishi kutya omu na owala okathimbo okashona keli meni lyoomwedhi ndatu,” ta ti ngaaka. Omunashipundi gwokakomisi Petrus Unengu okwa shilipaleke kutya otaya ka longa iilonga ngaashi ye yi inekelwa – itaye kiikwata nande.
Kakele kuUnengu, iilyo ikwawo yokakomisi oyo Penias Topnaar, Gerhardt Gurirab naPrisca Anyolo. -Nampa