Opolisi moshitopolwa shaShana oya lopota ya manga po aalumentu ye li 19 mehuliloshiwike, sho kwa li taya hingi ye li kohi yiikolitha oshowo taya hingi nuuhasha.
Sha ikolela komugandji gomauyelele gopolisi moshitopolwa shaShana Frieda Shikole, iipotha ayihe mbyoka oya patulilwa aalumentu 19, mehuliloshiwike.
Omulumentu omushona mokati kayo, oku na omimvo 22.
“Opolisi moshitopolwa shaShana oya tokola kutya kehe ngoka taka yona ompango nomalandulathano gomoondjila ga tulwa po, itaka pewa we egeelo lyopokathimbo e ta ethiwa, ihe otaya kala taya patulilwa iipotha nokupatelwa mo,” ta ti ngaaka.
Shikole okwa ti, oyendji oya thikama komeho gompangu ohela.
Opolisi otayi tsikile okukumagidha oshigwana shi hinge nuukeka, oshowo kaashi hinge shi li kohi yomalovu.
Tayi ti, iiponga ohayi etwa kokuhinga nuuhasha, onkene otayi kondololwa ashike ngele omuntu ye mwene ta hingi nuukeka.
Petameko lyomumvo nguka omukuluntu gwopolisi moshitopolwa shaShana Naftal Lungameni Sackaria okwa li a pandula oshitopolwa shaShana sho kwa li sha ihumbata nawa pethimbo lyomatango omanene. “Nonando iiponga ya li ya lopotwa mpeya naampeya, kakwa li tayi limbililike, shoka tashi ulike kutya oshigwana okwa li sha landula oompango nomalandulathanao ga tulwa po,’’ ta ti ngaaka.
Ta ti, pethimbo lyomatango omanene iipotha ashike iishona kwa li ya patululwa.
Sackaria okwa li a kumagidha oshigwana shi tsikile nombepo ndyoka, okuyanda iiponga oshowo omaso.
‘’Hulithii po okuhinga muli kohi yiikolitha. Omalovu ohaga eta uupyakandhi owindji, onkene oshi hwepo ngele aahingi taya ikaleke kokule nokuhinga ye li kohi yomalovu,’’ ta popi ngaaka.
Okwa ti oshitopolwa shaShana otashi tsikile okulonga nuundhiginini opo omalandulathano noompango andhihe dha tulwa po dhi simanekwe nokulandulwa okuyanda omaupyakandhi oshowo iiponga yoombaandhilila. –
vkaapanda@nepc.com.na