Omukulunhuwiliki mouministeli wehongo Sanet Steenkamp okwa ti ovanafikola nava kale momihandjo dofikola pomafimbo okupita mo ngeenge tava i komaxuliloshivike komaumbo molwashi oku na omeva efundja.
Okwa ti elalakano opo ku kelelwe ovanafikola vaha ninge oihakanwa yokufila momeva ile oku li komayoka ngaashi naana kwa lopotwa kutya momeva efundja omu na nomayoka.
Okwa yelifa ta ti ovadali ava tava dulu okuninga omalongekido oku ka tala ounona vavo keefikola ova manguluka okushinga ashike ava itava dulu nava efe ounona va kale komihandjo dofikola.
Steenkamp okwa lombwela Kundana Etine ta ti oikulya noshoyo ovanailonga hava longo momihandjo nokomakulo opo ve li va wana no ve li longekida okukala tava tonatele ovanafikola ngeenge ve li komihandjo.
Onghee ovadali ina va kala va limbililwa kombinga younona wavo shaashi ouministeli otau lalakanene onghalo nawa neameno yovanafikola.
“Ovanafikola otava kala tava ningi oinyangadalwa yavo yofikola pefimbo ve li momuhandjo. Ovanafikola itava kala tava i kondje yofikola shaashi omilandu domomuhadjo ita di kalunduluka,” ta ti.
Okwa hokolola ta ti ehongo keefikola dimwe ola ka lekwa manga konima eshi eefikola dimwe oda pata molwashi dili koshi yomeva.
“Otwa faneka opo ovanafikola va ka kale ve li meetenda omo tava longelwa keefikola odo dili popepi dihe na omeva,” ta ti.
Okwa ti ovadali ova longifa nale oshimaliwa shihapu ketameko eshi ovanafikola kwa li va tameka ofikola onghee omudali ou ehe na oshimaliwa ota dulu okuefa omunafikola waye a kale komuhandjo fiyo efundja ta liti po xwepo.
“Ovadali nava kale tava longelo kumwe novahongifikola, ovakulunhufikola novakulunhuwiliki vehongo moitukulwa opo va kale tava topolafana omayele nghee ovanafikola ve na okuyambididwa pefimbo e li lefundja,” Steenkamp ta ti.
Okwa indila omahangano a yooloka, ovanangeshefa novaleli vopapolitika opo va yambidide ovanafikola noikulya noshoyo oikwafifo hai dulu okulongifwa meefikola.
fhamalwa@nepc.com.na