Omulumenhu weedula 51 okwa fya eshi e liyasha nondjebo moshitaashi shopolifi yaNdangwa Etitatu efimbo lokomatango.
Edina laye inali shivifwa natango ashike okwa dile komukunda Oneshoko moshitukulwa shaShana.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakufya okwe uya moluumbo loshitaashi shopolifi yaNdangwa ndele ta kanghameke ololi oyo kwa li ta shingi.
Okudja opo vati ovanhu ova uda ondjebo ya topa eshi omulumenhu oo e liyasha momutwe ye mwene.
Opolifi oya hokolola tai ti omulumenhu okwa twalwa koshipangelo shaNandjokwe nokuxulifa konima yokafimbo eshi a fika moshipangelo.
Vati nakufya oku li omukalimo womodoolopa yaTsumeb ashike efiku olo okwa li a ila oinima mOndangwa e i twale koTsumeb.
Ina fiya po omukunda tau yandje ouyelele kombinga yefyo laye nomakonakono opolifi otaa twikile.
fhamalwa@nepc.com.na