Omudo wa dja ko okwa lopotwa oibofa 53 younona va ninga oihakanwa yokulongelwa ominyonena eshi va ekelwashi kovakainhu.
Oshitukulwa shaKhomas osho shimwe shi li pombada nomivalu 10 dounona va ekelwashi, Oshikoto ounona vahetatu, omanga Ohangwena nErongo mu na oibofa ihayali.
Moitukulwa ngaashi Zambezi, Kunene noKavango West inamu lopotwa oshibofa shounona va ekelwashi.
Edi oda lekwa komunambelewa womauyelele wopolifi moNamibia Inspector Raimbert Muronga eshi a hokolola ta ti ovakainhu 13 ova kwatwa po eshi va dipaa noku ekelashi ounona wavo.
“Ovafekelwa vamwe inava kwatwa po shaashi kape na ouyelele onghee eshi ohashi kala shidjuu kopolifi opo i dule okukala ya kwata po omufekelwa ngeenge kape na ouyelele we lixwa po,” Muronga ta ti.
Okwa kumaida oshiwana opo shi kale tashi longele kumwe nopolifi mokuyandja ouyelele kombinga yovanhu tava longo oimbuluma.
Okwa weda po ta ti omukainhu keshe taka hangika ta kupulashi okaana kaye na kale a lopotwa diva opo a pewe ehandukilo lopaveta.
Omuxungimwenyo mouninsteli woukashikekookanhu Selma Shilongo okwa kumaida ovakainhu opo va kale tava twala ounona wavo koipangelo ngeenge tava hepekwa koupyakadi wopamadilaadilo.
Okwa ti ovakainhu nava ka konge omakwafo koipangelo ile keembelewa douministeli woukashike kookanhu shaashi oku ekelashi okaana kakushi ekandulepo lomukundu.
Shilongo okwa yelifa ta ti ovakainhu vamwe ohava kala va kwatwa koshinyenu unene tuu ngeenge tate wokaana iha yambidida okaana kaye.
Onghee naashi ohashi eta opo ina yokaana a kale a kwatwa komhepo yokukupulashi okaana kaye shaashi oha kala a lulilwa konghalo yoluhepo.
fhamalwa@nepc.com.na