Opolisi moshitopolwa shErongo otayi indile moshigwana ku kehe mboka ye na omukwanezimo gwawo kaye mu wete opo ya thike kopolisi yaWalvis bay.
Omupopiliko omukuluntu gopolisi moshitopolwa shErongo Ileni Shapumba okwa ti, okwa itsuwa olutu lwomulumentu komusita ngoka ali a ka galikana koodunes lwopotundi 11h00 mOsoondaha. Nakusa taku fekelwa e na emimvo dhopokati.
Shapumba okwa ti, sho kwaningwa omakonakono kopolisi, otaku fekelwa kutya omulumentu ngoka okwi ikutha omwenyo sho a nu omuti wuuzigo gwoku dhipaga makokoloshe.
Omulumentu ngoka anuwa omulundhe kondjelo, a zala okahema okatokele nokotse yi na oondjila dhomalwaalwa ga yooloka. Ina adhika e na nando osha kolutu tashi ulike edhina lye nenge mpoka a za.
Opolisi otayi indile kehe ngoka ta kongo omukwanezimo gwe a dhengele omupolisi Johannes Sinoya konomola 081 7190 643 nenge Inspekta Johannes Mwatongwe konomola 081 2461 121 oshowo konomola yosasiona Narraville konomola 064 219071. Oomwendhi mbali dha piti omukiintu gumwe gwomimvo dho po kati okwa adhika a sa megumbo koshitopolwa shErongo sho a nu omuti gwomakokoloshe. Epangelo lyaNamibia olya indike omuti gomakokoleshe tagu ithanwa “boam” oshoka ogwa nika oshiponga go kagu na omukanda pitikilo okulandithwa moshilongo.
Kapu na uuyelele tawu ulike kutya oonakusa mbaka oyi ikutha omwenyo nomuti guni.