Paulina Ndalikokule
ONGWEDIVA – Ehangano hali ungaunga naanafaalama lyoNamibia National Farmers Union (NNFU) olya koleke kutya aanafaalama oyendji moshilongo oya tameke okutembudha iimuna yawo molwuuhupilo womwiidhi nomeya wa shuna pevi moshilongo.
Omukuluntu gwehangano ndyoka Kuni Samathe moonkundathana naKundana okwa ti, nonando ita vulu okugandja uuyelele wothaathaa kutya iitopolwa yini iimuna tayi tembuka nokuya kiitopolwa yini, oshili oyo ndjoka kutya ondjala yiimuna moshilongo nayo oya huma kegonga.
Omwedhi gwa za ko ehangano lyaanafaalama pamwe nomahangano omakwawo gaanafaalama moshilongo oga li ga indile omuleli gwoshilongo Nangolo Mbumba a pitike oshilonngo shi tale ko oshikukuta moshilongo ongoshiponga oshinene shopawushitwe, shika sha li sha tambulwa ko kuminista guunampya, omeya nomatulululo gwomavi Calle Schletwein.
Osha kala osho omukalo omimvo dha ka pita okutembula iimuna molwoshikukuta, oshitopolwa ShUuvudhiya nOkatyali moshitopolwahogololo shaShana oyo yimwe yomiitopolwa iishona moshilongo hayi kala nuuhupilo wiimuna uunene nuuwanawa.
Omimvo dhondjala dha zi ko iikundaneki oya lopotele kutya iimuna okuza kiitopolwa ngaashi Omusati, Kunene nOhangwena oya kala nokungundumanena iimuna yawo komahala ngoka mokukonga uuhupilo womeya nomwiidhi.
Kansela gwUuvudhiya Timoteus Shivute okwa ti uuhupilo moshtitopolwa moka owu li hwepo ashike otau ka enda tawu nayipala molwaanafalama mboka ya tembudhila iimuna yawo koshitopolwa hoka.
“Mpoka pe na omeya kape na omwiidhi, omanga mpoka pe na omwiidhi kape na omeya, oshi li hwepo ashike inashi gwana,” Shivute a ti ngaaka.
Ngoloneya gwaShana Elia Irimari naye okwa koleke kutya iimuna otayi tembudhwa okuya moshitopoolwa she nonando inaya ninga omapekakapeko gwopambelewa moshikumungu shoka.
“Katu na oongamba tadhi ngambeke olweendo lwiimuna miitopolwa yetu yokOwambo, yimwe oyi li kohi yelelo lyopamuthigululwako, osho iimuna hayi vulu okweenda ngaaka,” a ti.
Ngoloneya gwaHangwena Sebastian Ndeitunga okwa ti aanafaalama itaya vulu okutembukila koshipolwa she oshoka kamu na uulithilo washa.
“Pethimbo ndika uuyelele mboka inawu thika mo mombelewa yandje kutya ope na iimuna ya tembukila moshitoplwa, inandi tegelela iimuna yi tembukile muka oshoka omwa kukuta. Ngashiingeyi otu li nale pethimbo lyokuteya ashike momapya kamu na sha shokutewa, omwa kukuta owala,” Ndeitunga ta ti.
Okwa ti oshitopolwa ashihe inashi mona omvula ya gwana, ta gwedha po kutya mboka taya ka landa iilya yokulya naya pitikwe kaape na ofuto yopoongamba.
“Kandi shi shi kutya otatu vulu okulongitha omukalo guni tu mone kutya oyeni ya landa iilya yokulya naamboka taya landa iilya yokulanditha, otatu vulu okulongitha nando oondunge kutya ngele omuntu ota landa ontungwa yimwe ota ka lya ina futihtwa,” Ndeitunga a ti.
Okwa indile ookansela ya longe nuudhiginini okutotha mo mboka ya pumbwa omakwtho giikulya gomeendelelo, ta kunkulile woo aakwashigwana ya kwate iikulya nawa ya thike komuloka.
“Natu kwathelathaneni, otatu ka kaleni tu na omukumo, tatu imangeni epaya, tatu hupu tw afa oshimeno shoWelwitchia shoka sha kala nomwenyo mombuga mwaa na omeya uule womivo omathele gaali,”Ndeitunga a ti ngaaka.
Ohangwena oya ndhindhilike omagumbo ga thika pomayovi omilongo ne nahetatu ge li mopumbwe yoshikukuta, momwaalu moka omagumbo owala ga adha pomayovi omulongo nahamano ga mona oshikukuta nuumvo, ngoloneya ta ti. Omanga mOshana omagumbo ga thika pomayovi omulongo naheyali ga pewa oshikukuta.
Omvula yonuumvo inayi loka nawa moshilongo ashihe, shoka she eta ondjala onene moshilongo kaantu niiimuna. Epangelo okupitala mombelewa yomupilima minista olya ninga onkambadhala okugandja iikulya kaakwashigwana, ashike ot yi pewa unene mboka ye na ompumbwe yomeendelelo.
Shika osha eta omanyenyeto ogendji moshigwana, taya ti oshikukuta osha kwata oshilongo ashihe. Iikundaneki oya lopota olundji iikulya yoshikukuta tayi yakwa moombelelwa, yimwe ya kala ike moombelewa sigo tayi ningi nayi.
Iimuna sigo onena inayi pewa iikulya yasha okuziilila kepangelo omuvo nguka.
-ndalikokulep@gmail.com