ONAMBANGO – Oshihtuthi shomagongo shoka hashi ndhimbulukiwa nokutyapulwa omumvo kehe, okwa tokolwa opo shi kakale kOukwanyama momumvo tagu ya.
Nuumvo oshiindingili shika osha dhimbulukilwa lwoshikando oshiti-14 nosha li kOmbala yoshitunda shaNdonga kOnambango, moshitunda shaNdonga moshitopolwa shaShana Olyomakaya.
Aaantu yathika po7000 lyaampoka, mwa kwatelwa omupresidente gwoshilongo Nangolo Mbumba, omupevi presidente Netumbo Nandi Ndaitwah, omupilimaminista Saara Kugongelwa, iilyo yokambineta aanapolitika aanambelwa aanene, aanangeshefa niilyo yomalelelo gopamuthigululwakalo agehe ga gahetatu oya li yamwe yomaayenda ya simana, noya li ya waiminwa kaakwashigwana yaza koombinga noombinga.
Esiku ndyoka olya tyapulwa pamukalo gwa yooloka, sha ikwatelela komithugululwakalo, nosha mwenyekwa niidhano ya yooloka.
Omupresidente Nangolo Mbumba esiku ndyoka sho a thikama komeho goshigwana tango okwa indile aantu ayehe poshituthi shomagongo ya opo ya thikame nokusimaneka oshowo okugandja omahambelelo komukokoli presidente Sam Nujoma. “Omukokoli-presidente okwa gwanitha omimvo 95 nuumvo, onkene ota tu mu halele omimvo ondhindji komeho. Otandi ndhimbulukwa nawa sho e tu lombwele kutya omuthigululwakalo nagu simanekwe sigo aluhe. Moka omwa kwatelwa noshituthi shomagongo sho osho shetu gongaleke nena mpaka,” ta ti ngaaka.
Mbumba okwa indile iilongo iilongo ayihe moSADC oshowo muuuyuni opo Namibia a yambindhindhwe niikulya omolwa oshikukuta shoka sha taalela oshilongo. “Otwe shi tseyithile nale iilongo yoSADC kutya otwa taalela oshikukuta notwa pumbwa eyambindhindho lyomeendelelo, no ta tu indile natango okuza kookume ketu muAfrica kutya otuli mompumbwe yiikulya,” ta indile ngaaka.
Mbumba okwa gwedha po kutya otaya pandula unene ngele ya yambindhindhwa niimaliwa opo ya vule okuninga oombola ndhomeya. Omupresidente esiku ndyoka natango okwa kumagidha oshigwana ashihe shi ishangithe omwendhi tagu ya opo shi vule okukutha ombinga momahogololo.
Omuthigululwakalo
Omukwanilwa gwOndonga Fillemon Shuumbwa Nangolo okwa ti aantu mboka ya nu omagongo esiku ndyoka omanga inaanwa oya kokota ekala.
“Nena ota tu gwanithipo yimwe yomiinakugwanithwa yopmuthigulwakalo, tu na oku yi kaleka po, nongele itatu yi kaleke po kapena gumwe tekeyi gwanitha po,’’ ta kumagidha ngaaka. Ta ti, omagongo shito ohaga endele pamwe niidhano yoongombe, mbyoka tayi ka nigwa momasiku ta geya.
Nangolo okwa ti omuti gwomugongo ogwa simanekelwa iilonga ya go oshowo ayihe hayi e twa po okuza momuti moka.
Omunashipundi gwomalelo gopamuthigululwakalo gokonooli Herman Ndilimani Iipumbu okwa ti ethimbo lyomagongo, pamuthigululwakalo gwOshiwambo, ihaku pangulwa oshoka anuwa otashi vulika omupogoli kaali e shi sho tangi oshoka pamwe okwa ashika a nwa.
“Oompango ndhoka odha zi muuyuni wonale, onkene otwa tsikile nadho sigo onena ongesimaneko lyomuthigululwakalo gwetu,’’ Iipumbu ta popi ngaaka.
Ta ti, oshoka omugongo ohagu kolwa ashike lumwe momvula okuza momwedhi gwaFebuluali, nongele wa kuka opowo ano ohapu piti ethimbo ele inaagu nuwa.
“Omagongo oga kala ogo ashike oshikolitha monakuziwa, onkene opwa tulwa oompango kutya itaku endwa niilwitho oshoka ngele aamuntu ya nu ya pitilila otaya pogola. Ndyoka olyo etompelo aantu ihaaya pangulwa ethimbo lyongongola, iihokolola ohayi tameke yaApiilili,’’ ta popi ngaaka.
Okwa gandja oshiholelwa kutya uuna omukiintu a pewa enkawa megumbo pethimbo lyomagongo komusamane, kali ha pewa ombedhi oshoka otaku fekelwa a nwa ongongola.
“Oshituthi shomagongo kashi shi okunwa ongongola, ihe okuhambelela iipalutha ya longekindhwa kuNampongo oshowo okusimaneka nokukwatela po omuthigululwakalo,’’ omupopiliko gwelelo lyOndonga Frans Enkali fatulula ngaaka.
Enkali naye okwa thindi omuthindo kutya ethimbo lyongongola oshigwana osha indikwa okwenda niilwitho.
Ta gwedha po kutya oompangu dhopamuthigululwakalo pamuthika gopamikunda ohadhi kankamekwa manga sigo omagongo ga kuka.
Ta ti, ongongola otayi vulu okugandja oompito dhiilonga nohayi gandja iikulya niikunwa oshowo ohayi longithwa poompito dhilwe. “Ongongo ohayi imi komugongo, ihe ngele oya gwile pevi ohayi ningi ongongola,” ta popi ngaaka.
“Oongongo ohadhi e ta po omagongo, ohadhi eta po omahuku haga ningi omagadhi goongongo. Ohadhi vulu okuninga iikunwa yilwe kaayina iikolitha,” ta hokola ngaaka. – vkaapanda@nepc.com.na