Okangundu kaaxwaxwameki moshitopolwa shaShikoto oka gandja oshietwa po taka pula opo pu totwe oshitopolwa shimwe, andola tashi pambula kOshana, kOshikoto nokOhangwena.
Mbaka otaya ti shika otashi ka kwatha moku thikitha omayakulo koshigwana.
Okangundu haka oka li ka thikitha osheetwapo shako kokangundu koku talulula etendululo lyoongamba koBoundaries Delimitation and Demarcation Commission sho katalele po oshitopolwa shOmuthiya mEtiyali.
Mbaka oya hala opo oshitopolwa oshipe shi lukwe Oshikoto West.
Akangundhu hoka ka kwatelwa komeho kuAcktofel Uugulu, otaka ti etotepo lyoshitopolwa shoka otali ka kwathela Ondangwa ndjoka yin a omuyalu gwaantu oyendji. Taya ti Ondangwa oya koko muule womimvo dha piti noya ningi ehala lyopondingandinga moku gandja omayakulo kaantu oyendi noonkondo.
“Ondangwa oya koka noyi na omayakulo giihwapo gopashinanena, yo ishewe oyuudha omatungo gepangelo ihaaga longithwa sha, notaga vulu oku ninga oombelewa dhoshitopolwa shoka tatu pula mpaka shOshikoto West region,” Uugulu ta ti.
Osheetwapo shika otashi pula opo oshitopolwa oshipe shi kwatele mo iikandjohogololo ngaashiOnayena, Olukonda,nOniipa mbyoka yi li mOshikoto, omahnga yah ala kOhangwena kwa ombinga yimwe yoshikandjohogololo Omulonga noshipambu shoshikandjohogololo shEenhana, kOshana andola otaku zi Otyali, Uukwiyuushona, Okaku nOndangwa Rural.
Okangundu otaka ti aantu yomiikandjohogololo mbyoka ohaya ende oondjila oonde oku ya koombelewa oonene miitopolwa yawo. Ta ti ohaya thigwa po kuuyelele oshowo kiinyangadhalwa yuuhupilo oshoka oye li kokule.
“Oshitopolwa oshipe otashi ka eta omakwatho popepi naantu yomiikandjohololo ndjoka twazi nokutumbula,” Uugulu ta ti.
Okangundu oka ti oka ya mekwatathano naantu oyendji mboka ye na mo sha moshinima muka mwa kwatelwa elelo lyopamuthigululwakalo lOndonga omalelo goondoolopa Ondangwa nOniipa, aaleli yopamithigululwakalo, oongeleka, aanangeshefa naakwashigwana mboka ya gumwa koshinima shika. Ashike Kansela gwOlukonda Constituency, Fillemon Ndjambula, okwa ti yo inaya lombwela oshinima shoka.
Oka komisi oka kwatelwa komeho komupanguli eli mopenzela Judge Petrus Unengu. -Nampa