Aaantu yaali, yomimvo hetatu oshowo omimvo 40, oya si eso lyi nyanyaleka sho ondunda yomwiidhi moka ya li, ya kwatwa kokashelu nokutsama omulilo mehuliloshiwike.
Sha ikolela kepeko lyopolisi, oshiningwanima shika osha holoka momukunda Onehova momudhingoloko Omundaungilo, lwopotundi 17h00.
Otaku hokololwa kutya megumbo moka mwa holoka oshiningwanima shoka, omwa li mu na aanegumbo yahetatu, ihe okwa li ye shi pondola okuhupa moshiponga shika shonndalu yaNelyanga.
Oonakusa oya tseyika nomadhina Sylvia Nghinananye Moses oshowo Sakeus Simon.
Moshiningwanima inaashi fathaana, omulumentu gomimvo 31 okwa mangwa po kopolisi sho anuwa a kwata omukiintu gwomimvo 31 koonkondo komeho gomona gwomumati gwomimvo hamano.
Opolisi oya ti oshingwanima shoka osha holoka lwopotundi 02h40 mOlyomakaya, molukanda Okombahe, momundhingoloko Omaruru
Otaku hokololwa kutya nakufekelwa oya li taya nu pamwe omalovu nomukiintu ngoka, nokwa li e mu landula monima, nanakungingilwa omuyonena ka li e na ontseyo oshoka oye a li a yi tango.
Omukiintu ngoka anuwa sho ayi mondunda ka kwali a endhile omweelo gondunda ye nawa, no mulumentu ngoka anuwa okwa li a ponokele omukiintu ngoka.
Otaku hokololwa kutya inaya kala mekwatathano lyopahole.
Omakwatokoonkondo onkene taga tsikile okuningilwa oshigwana, noga lopotwa taga indjipala unene miitopolwa yokonooli.
Opolisi oya kumagidha oshigwana aluhe shi kale tashi lopota iiningwanima yoludhi nduka opo mboka taya longo iilonga mbyoka yi kenyaneka ya pewe egeelo.
Tayi ti, omakwatokoonkondo otaga ningilwa wo natango aanona aashona ye li natango mosikola, shoka tashi teyagula po onakuyiwa yaanona.
Opolisi oya ndhindhilike kutya iiningwanima mbika ohayi longwa unene kaapambele oshowo kaantu yopopepi. vkaapanda@nepc.com.na