Paulina Ndalikokule
Omupopiliko gwopolisi mOshana inspekta Frieda Shikole okwa ti opolisi nuumvo oya pondola okumona iihauto ihamano ashike okuyelekanitha niihauto 12 mbyoka ya lopotwa yakana okuza Januali sigo Juni nuumvo.
Mwekwatathano naKundana, Shikole okwa ti iihauto mbyoka 12 omwa kwatelwa ooCorolla 10, oToyota Passo yimwe osho wo oMitsubishi yimwe.
Ta ti oohauto ne odha adhika meni lyoshilongo omanga mbali odha adhika moAngola, ndhoka ye dhi mono melongelokumwe nopolisi yaAngola.
Shikole okwa londodha ooyene yiihauto ya kale nokukwashilipaleka kutya iihauto oya pata nawa uuna taya zi mo moohauto opo ya vule okuyanda uulunga woohauto. “Otandi indile woo ooyene yoohauto ya kale nomafano goohauto dhawo oshoka ohashi kala oshipu kutse ngele tatu kongo ohauto tu yi wete mefano, tse tatu andjakaneke woo efano ndyoka koshigwana opo shi yambidhidhe mokumona oohauto ndhoka,” a ti ngaaka.
Opolisi ohela oya galula ohauto ontokele yoToyota Corolla yongushu N$40 000 ndjoka ya li ya lopotwa ya yakwa po, sho ya a dhika moAngola ya thikama. Mpoka ya adhika, opwa adhika woo ongaku dhoshilumentu, nopolisi otayi fekele kutya aafekelwa oya undula ohauto oku yi kutha molugumbo mOndangwa nokulongitha iilongitho kaayi shiwike okuhwameka ohauto ndjoka.
Kape na aafekelwa ya mangwa po moshiningwanima shika nohauto oya gandjwa nale kumwene.
-ndalikokulep@gmail.com