Paulina Ndalikokule
Aahingi yomaloli mboka haya thikameke omaloli gawo kooha dhopate koshitopolwa shaKaras shaaha li paveta otaya indilwa ye ga kuthe po.
Mboka ya totwha mo unene aahingi yomaloli ga humbata omanganese kopate yoTrans Orange Corridor oku za koongamba dhaNakop okuuka koGrunau naKeetmanshoop okuya komatulilo gaLuderitz.
Omupopiliko gwehangano lyoRoad Authority Hileni Fillemon momushangwapitithi kiikundaneki ohela okwa ti omaloli ngoka oga thikamekwa pomahala ga indikwa nota ga vulu okweeta omaupyakadhi kaalongithi yoodjila.
“Ohashi eta uupyakadhi uunene nokwiimba aahingi ya mone komeho, shoka tashi vulu okweeta iiponga iinene yoomodjila. Omaloli ngoka ota ga vulu woo oku yonagula omungenge wopate,” Fillemon ta ti ngaaka.
Ta ti kutya pomahala mpoka kape na aanilonga yoku opaleka, naashoka tashi vulu okwe eta ekuyunguto pokati koshigwana nehangano lyoondjila oshoka iiyagaya mboka hayi thigalampo otayi vulu okweetela iimuna uupyakadhi.
Fillemon okwa ti aahingi yomaloli osho wo iilyo yawo ota ya kumagidhwa yalongithe omahala ngoka ga tulwa po oku vululukilwa moshilongo ashihe.
“Omahala ngoka oga tulwa po oku vulukilwa nombili negameno kaayendjila, onkene otatu indile aahingi yomaloli yiiyuthe koompango yo ya longithe omahala ngoka,” Fillemon a ti.
Okwa ti aalongithi yoondjila otaya vulu oku indila omahala gokuvululukila ga gwedhwa po, ta ya gandja omatompelo kutya omolwashike ina yahala oku longitha ngoka ga tulwa po.
Fillemon okwa ti mboka taya ka adhika ya thikama pomahala ngoka inaga uthwa otaya ka taalela ompango nokufutithwa.
-ndalikokulep@gmail.com