Paulina Ndalikokule
Esilohenda okumangulula oonkwatwa mondholongo komupresidente gwoshilongo, itali ka kwatela mo mboka ya longa iimbuluma yi nyanyaleki.
Etokolo lya nyanyangidhwa momushangwa gwepangelo olya gandja elombwelo koondholongo nomazulonkalo kutya presidente oku na oonkondo dhokusila ohenda aanandholongo yamwe ihe inamu kwatelwa aadhipagi, aakwati koonkondo, mboka ya ninga onkambadhala okuumbako epangelo koshipundi, mboka ya ehamaka aantu shinyanyalithi, mboka ya yaka ya homata, aalongithi yiingangangamithi, aadhipagi yiithitukuti ya gamwenwa yi na ongushu y ivule po N$5000, mboka ya yakela moshilongo iilwitho osho wo mboka ya pititha iimaliwa shaa li pafeta.
“Aanadholongo mboka itaya ka pewa we esilohenda omwa kwatelwa mboka ya li yadhiminwa po nale nenge ya kuthilwa ko kiipotha yawo ndele taya yono ishewe okuza nkene oshilongo sha mangulukile, mboka ye na iipotha yilwe inayi pwa, oonakuninga omiyonena mboka yali ya shunithwa moshigwana ndele taya yono ishewe, mboka yi iyaka mondholongo nenge ya ningi oonkambadhala okwiiyaka mo oshowo mboka ya ehameka aanambelewa yomazulonkalo,” omushanga taguti.
Aanandholongo mboka taya ka pewa edhiminepo omwa kwatelwa mboka ya shunithwa nale moshigwana manga omasiku 21 March 2024 inaaga adha, mboka ya longa shi vulithe petata lyoomvula lyomageelo gawo, mboka ya adha oomvula dhopenzela nenge ye vulithe po nonando inaya longa oomvula dhi vule petata ya kala nokwiiyutha koompango, mboka uundjolowele wawo wa monika kaawu li nawa, aanona ye li kohi yoomvula 18 inaya ya metata lyokulongela oomvula ashike oya kala nokwiiyutha koompango osho mboka ye li kohi yoomvula 18 ya kala nokwiihumbata nawa ya monika kutya kaye shi we oshiponga koshigwana notaya mangululwa uuna ya gwanitha etata lyoomvula dhegeelo.
Aanadholongo yamwe otaya ka kuthilwa ko oomwedhi ndatu, hamano, 12 nenge 18 komageelo gawo sha ikwatelela kutya oya longa ko nale etata lyoomvula komageelo ya kala nokwiihumbata nawa yo ya monika kutya kaye shi we oshiponga moshigwana.
“Mboka inaya gwanitha etata lyomageelo gawo, ekuthileko lyoomwedhi ndhoka ndatu, hamano,12 nenge 18 otali ka ya owala miilonga uuna ya gwanitha etata lyoomvula dhomageelo gawo ngele yi ihumbata nawa yo oya monika kutya keyi shi wee oshiponga koshigwana,” omushangwa gwa lesha ngaaka.
Omukuluntu gwoondholongo nomazulonkalo komufala Raphael Hamutenya momushangwa kiikundaneki mEtitatu okwa ti otaya ka gandja esilohenda ndyoka kaanadholongo ye vule po2000.
Ta ti momazulonkalo moshilongo omu na aanadholongo ye li 4 330, omanga oonakuninga omiyonena ye li 1 574 ya shunithwa moshigwana taya gandja omayakulo moshigwana.
-ndalikokulep@gmail.com