Etameko olyo omindhi dha kola lyelila lyomwiilongi kehe, oshoka olyo hali longo ongongudhi yelongo lyongushu, osho omukuluntuwiliki gwelongo moshitopolwa shaKunene Sophia Fredericks a thamuna ngaaka. Fredericks okwa dhenge omuthindo kombinga yesimano lyelongo lyopetameko lya kola sho a li moonkundathana noNampa, shi na sha niizemo ya nkundipala yondondo onti-11 no-12 yomumvo gwa zi ko yekonaakono lyopashigwana.
Omukuluntuwiliki gwelongo nguka okwa li a popi nkene oshitopolwahogololo shaKunene sha taalela omashongo ondumba, nalimwe lyomomashongo moka olyo elongo lyopetameko lya nkundipala moshitopowa. Okwa ti wo oongundu dhopevi sigo ondondo ontiheyali odha pumbwa esiloshiho lyopombanda.
“Shimwe shoka twa dhimbulula osho shoka kutya iizemo mbika kayi na sha ashike nondondo onti-11 no-12. Iizemo iiwanawa iyi na sha nelongo lyopetamekolya ngushupala, ndyoka lyi na okutameka pondondoyoshikunino, ondondo yotango nondondo ontiyali.Etameko lya kola olyo oshinima sha simana notashikwatha miizemo yahugunina,” ta fatula ngaaka.
Fredericks okwa ti wo oshitopolwa otashi pula komeho okukandula po omashongo, naalongi yongundu yoshikunino oya li ya pewa omadheulo noya pewa oonzo mokuzula aanona yoongundu dhopetameko, notashi ka yambula po iizemo yondondo onti-11 no-12.
“Otwa itaala kutya ezulo lyopetameko otali kwathele okuutha iizemo yopoondondo dhosekondele. Ontsapo yetu hayo naanaa, otayi tengaatenga, ashike otatu tala muule womimvo ndatu twa taalela tu tale ngele otapu kala elunduluko. Sigo oompaka, ayihe oyi li kolutenda, notwa itaala otatu ka kala niizemo yi vule shito,” Fredericks ta ti ngaaka.
Muule woomvula ntano dha ka dhilongela, oshitopolwa shaKunene osha kala osho shimwe shomiitopolwa yi na iizemo ya nkundipala, taku popiwa kutya shika otashi etwa konzo dhelongo dha nkundipala, unene miilongwa ya nika uunongononi. Ashike epangelo otali longo pwaa na oluthuwo opo omashongo ngaka ga kandulwe po.
Nonando iizemo ya hwepopala momumvo 2023 okuyelekanitha nomo2022, oshitopolwa shaKunene onkene natango sha mana ponomola onti-14 momakonaakono go-NSSCO.
-Nampa