“Ovanhu ohava longo omaliko ova noudjuu, ndele ove owe a vaka po noku a landifa po. Omaumbo ovakwashiwana ka eli meameno…”
Edi oda popiwa kumengestalata Helena Ekandjo pefimbo a li ta yandje ehandukilo lodolongo, komulumenhu ta tamenekelwa oibofa ivali yeteyo lomaumbo.
Ka kwa li shipu kuLukas Patrao Nangolo eshi auda kutya ota pewa eemwedi 30 dehandukilo modolongo. Oshipala shaye osho sha kala sha dima momukokomoko aushe womhangu, no itashi ulike
naanaa omaliudo aye, osha lunduluka meendelelo eshi a uda ule fimbo oo a tokolelwa a kale modolongo. Okwa tameka ta tadi omahodi a hala okufilwa onghenda.
“Ame ihandi longo oilonga ya sha. Ohandi nyangadala ashike nokukosha eetuwa dovanhu molukanda letu,” ta ti.
Nangolo okwa hokolola komesho yomhangu ta ti oku na ounona va heyali va pumbwa okuyambididwa onghee ngeenge okwa kala modolongo efimbo lile ka pena ou ta yambidida ounona vaye.
Omulumenhu ou okwa li a kwatwa po neudo eshi vati a kala nokulonga oimbuluma yokuteya omaumbo ovanhu modoolopa yaShakati nOngwediva.
Okwa li a pewa ehandukilo lemweedi 30 modolongo eshi monika ondjo moibofa ivali youmbudi wokuteya omaumbo nokulandifa po omaliko ovanhu Etitatu.
Pefimbo a holoka komesho yamengestalata mOshakati, Nangolo okwa pula opo omhangu i mu etele onghenda, yo imupe eemwedi di nini modolongo shaashi vati opo lwotete ta longo oshimbuluma osho.
Mengestalata Ekandjo okwe mu lombwela ta ti oku na okukala modolongo opo e li honge oshilongwa shokukala ita teya vali omaumbo ovanhu.
Okwa yelifa ta ti oovene vomaumbo ova kanifa omaliko avo mahapu a vakwa po komutamanekwa ou eshi a kala vati ta landifa oinima ei a vaka.
Ekandjo okwa ti omhangu oina oufemba wokuyandja e handukilo komunhu keshe ta monika odjo moshimbuluma shonhumba.
Omutamanekwa okwa lombwelwa opo a kale a kwatafana nomhangu ya kula mOshakati ngeenge okwa hala oshibofa shaye shi talululwe ashike oku na okushininga meni lomafiku a heyali.