Komufala wopolifi moshitukulwa shaShana Commissioner Naftal Lungameni Sakaria okwa ninga omutumba novakulunhu veembaanga opo va kundufane kombinga yovakwashiwana va ninga oihakanwa yokunyekwa oshimaliwa shavo ngeenge tava di meembaanga.
Sakaria okwa ti okwa talela po eembaanga da yooloka Etine konima ombelewa yaye ya kala nokudidilika ovanhu hava ka nifa oimaliwa yavo ihapu.
Ovakwashiwana ohava kala tava fekele kutya vati ovanailonga vomeembanga ove na ekwatafano novanhu ve li kondje yombaanga eshi vati hava kala tava kwatafana nokuyandja ouyelele komunhu ngeenge a nana oshimaliwa shihapu.
Ovakainhu novakulupe ovo unene va ninga oihakanwa yokukala tava nyekwa oimaliwa yavo ngeenge tava di keembaanga.
Okwa ti elalakano lokushakaneka ovakalunhu veembaanga okukundafana kutya oshike tashi ningwa po opo kukelelwe ovanhu vaha nyekwe vali oshimaliwa shavo ngeenge tava di keembanga.
“Otwa kundafana yoo vali kombinga yo shi etifi youmbudi wokunyeka ovanhu oshimaliwa shavo unene tuu ngeenge omunhu kwa li aya meni lombaanga,” Sakaria ta ti.
Meenghundafana a ninga naKundana Sakaria okwa hokolola ta ti ombelewa yaye otai lalakanene okukala ya kandula po omukundu wovanhu tava nyekwa oimaliwa yavo ngeenge tava keembaanga.
“Pefimbo nda ninga eenghundafana novakulunhu veembaanga ova hokolola tava ti ovakwashiwana vamwe ove hole okupopya mokati kovanhu kutya otava i kombaanga omanga ovanhu vamwe ohava kengelelwa kovakwapata vavo eshi hava yandje ouyelele komunhu wonhumba opo e uya a nyeke ko oshimaliwa,” ta hokolola.
Okwa ti ova tula po eudafano neembaanga opo di kale tadi dengele opolifi ngeenge pena omunhu e uya okunana oshimaliwa shihapu opo a kale a findikilwa kopolifi okudja kombaanga.
“Opolifi oye li longekida efimbo keshe okukala ya findikila omunhu keshe tadi mombaanga a nana oshimaliwa shihapu. Onghee otwa lombwela ombaanga opo i kale ya xulifa po okukala ya yandje oshimaliwa shihapu komunhu pehe na opolifi,” Sakaria ta ti.
Okwa weda po ta ti itashi ulike efano liwa ngeenge omunhu a longo oshimaliwa shaye noudjuu ndele otashi nyekwa ko kookalyamupombo ina va hala okulilongela vo vene.
“Ohatu lalakanene okuxulifa po oimbuluma moshitukulwa shaShana. Oshiwana noshoyo omahangano a yooloka nashi twikile okulongela kumwe nopolifi mokukondjifa oimbuluma,” Sakaria ta ti.