Omahala geli gatano oga tulwa omatenda gokukwatakanitha omawi mombepo moshitopolwa shaHangwena oshiwike sha zi ko.
Shoka okwa li sha ningwa okupitila moployeka yobilliona, ndyoka kwa li ya totwapo mo2017 muAguste, nelalakano lyokwaandjaneka omakwatakanithi gomawi mombepo.
Omukuluntu gwehangano lyokukwatakanitha omawi mombepo Tim Ekandjo okwa ti, elalakano okugwanithilapo oshigwana ashihe, omauwanawa gomakwatakanithi gomawi mombepo, okuza momahala geli 524 ngoka ga longekidhwa komahangano ga yooloka moshilongo.
‘’Sigo ompaka omahala geli 260 oga longwa gapwa, no gena omakwatathano gomawi taga longo nawa,’’ ta ti ngaaka.
Ta ti, omahala ngoka gatano oga eta omwaalu 16 moshitopolwa shaHangwena, ga tulwa omatenda ngoka okupitila moployeka 081.
‘’Omahala ngoka ga tulwa omakwatakanithi gomawi moshitopolwa shaHangwena ogo, Omhedi, Omahayi, Okatope Ka Melila, Ondobe Yomunghudi oshowo Oshiti shaHaihonya,’’ ta ti ngaaka.
Ta gwedhapo ta ti, omahala agehe ngoka otaga longitha o3G, no ga li ga tameke okulonga petameko lyomwendhi Sepetemba nuumvo.
Ekandjo ta ti, omatenda ngoka otagaka kwatathana oshowo okuyambindhindha omikunda ndhili popepi, ndhoka ndha kala kaandhina omakwatakanithi gomawi.
‘’Omakwatakanithi gomawi ngaka ogena oshilongo no tagaka kwathela oyendji, unene mboka yeli kuushayi opo ya kale yeli mombepo,’’ ta ti ngaaka.
Ta ti, oployeka ndyoka 081 oya nuninwa okuyambindha oshigwana ashihe moshilongo, opo kehe omuNamibia a kale eli metwatathano lyomawi mombepo.
‘’Oshigwana oshina okuhuma komeho noku endela pamwe noshinanena. Mboka taya longitha o2G otayaka longitha 3G kuushayi omanga mboka taya longitha o3G tayaka longitha o4G moondoolopa,’’ ta ti ngaaka.
Ta gwedhepo kutya MTC okuna ontseyo kutya opena omahala ngoka ga tulamo omayindilo opo ga mone okwatakanithi gomawi, no taya kwashilipaleke kutya ogena okugwanithilwapo omayindilo ngoka, opo oshilongo ashihe shi kala shili momakwatathano gomawi
mombepo.
Omakwatakanithi gomawi oshinima sha simana mongaashingeyi, mpoka kapena omakwatakanithi gomawi, kapena shoka tashi humu komeho oshoka aantu kayeli mombepo no kayena nkene yena okukwatathana.
– vkaapanda@nepc.com.na