Omuhandjo gwosikola Oshamkweni Combined School ndyoka ya kala ya taalela onkalo ya nyayika, yina aalongwa taya lala momalukalwa inaaga longekidhwa, go kaage na uundjolowele osho gwa pu okutungwa.
Osikola Oshamukweni combined oyili moshitopolwa shaHangwena momundhingoloko Oshalumbu, no hayi hiti aanona ya pita 300, okuza koshikunino sigo ondondo 9.
Aanasikola oya kala haya lala moombashu ndoka ya ndhiki posikila oomolwa iinano ile haya mbyoka ende okuza komagumbo. Oyendji yomaanona mboka oya kala monkala inaayi nika uundjolowele, kaye na oombete dhokulala –otaya lala koombete dhiiti, yo ishewe kaye na ehala lyoku lala lya longekidhwa.
Petameko lyomumvo gwayi, omahangano oKalahari Holding noFootstep for Africa oga li guuvu omakemo gosikola ndyoka no kuyi yambindhindha, no kuyi tungila oongulu dhomihandjo dhaanasikola nosho wo okombitha.
Kalahari okwali a gandja oshimaliwa shomiliona N$1.5, omanaga Footstep for Africa ali a gandja oshimaliwa omiliona 1.4.
Osikola ndjika ngashingeyi oyi na oongulu mbali ndhomihandyo uundjugo, okombitha oshowo ehala lyokulila.
Omunashipundi gwehanagano Kalahari holding Martin Inkumbi momushangwa a li a longekindha esiku ndyoka okwa popi kutya, oya li ya lesha noku mona onkalo yosikola ndyoka miikundaneki tango, petameko lyomumvo gwayi.
‘’Onkalo ka kwali tayi ulike nawa nando, shoka kwa li shetu kutha momutumba no kwali tweya okuyi talelapo. Okwa li twa ziko nomitima ndhaziyalala, omolwa onkalo yataalelwa kaanona yosikola,” ta fatulula ngaaka.
Ta ti okwa li ya kundathana nkene yena okuyambindha osikola ndyoka, shoka yali ya tula miilonga.
“Otwa yambindhindha ongulu yomuhandjo tayi gwana oombete 64. Otushi shi lela kutya ongulu ndyika itayi ka gandja oompito kaalongwa ayehe, ihe ondi wete kutya otayi eta elunduluko posikoola mpaka,’’ ta popi ngaaka.
Omukuluntu gwelongo moshitopolwa shaHangwena Isak Hamatwi okwa popi kutya omayambindhindho ngoka otaga ka lundulula onkalo yaanona posikola mpoka.
“Onkalo posikola Oshamukweni oya lunduluka okuza nena, ya ningi
ohwepo.
Otandi pandula ehangano lyoKahari sho lyayambindhindha nokulundulula onkalo yaanona posikila mpaka,” ta ti ngaaka.
Ta gwedha po kutya osikola ndyoka oyina ondjila onde nomauwanawa ogendji ge li komeho onkene itaya sholola okuyi kondjela yi hume komeho.
Ngoloneya gwoshitopolwa shaHangwena Walde Ndevashiya okwa li apandula ehangano ndyoka sho lya yambindhindha osikola ndyoka ya ningi ethimbo ya taalela onkalo kaayishi okwiindhindhimikilwa.
“Omakwatho golundhi nduka oga pumba, unene pethimbo ndika lyeliko lyoshimaliwa kaalili nawa, onkene otashi kala oshimpwiyu shetweni atusheni twakatela mo aavali okuli kaleka monkalo yi li nawa,” taku magindha ngaaka.