Uuministeli womindhingoloko iihwa nomatalelopo otau kumagidha oshigwana shi kuthe ombinga mesiku lyokoopaleka muuyuni, ndyoka hali dhimbulukwa omumvo kehe.
Namibia otaka dhimbulukwa esiku ndyoka hali dhimbulukiwa muuyuni awuhe momasiku 17 gaSepetemba nuumvo, kohi yoshipalanyolo, “ndika olyo ashike egumbo tu na”.
Omupresidente gwoshilongo Hage Geingob, momumvo 2018 okwa li a popi kutya Namibia ota kala ha kutha ombinga mookopaleka omumvo kehe. Sha ikolelela komushangwa gwa pitithwa komupopiliko muuministeli womidhingoloko iihwa nomatalelopo Romeo Muyunda, Namibia okwa kala ta kutha ombinga mokoopaleka okuza mo2018, nota tsikile okukutha ombinga. “Uministeli owa hala okoopaleka ku tsikile sigo aluhe, opo Aanamibia ya kwatwe kombepo yuuyogoki, oshowo ya kaleke oshilongo shika sha yela, kaashi kale ehala lyoongaga,’’ ta fatulula ngaaka.
Ta ti, onkene ota kumagidha kehe Omunamibia a kuthe ombinga mokoopaleka oshilongo shika shi kale sha yela.
Ta gwedha po ta ti, esiku ndyoka na li kale lya simanekwa ku kehe gumwe.
“Oshiindingili oshinene otashi ka ningilwa moshitopolwa shOtjozondjupa mondoolopa yaGrootfontein, shoka tashi ka kwatelwa komeho kuminista gwomidhingoloko, iihwa nomatalelopo Pohamba Shifeta,’’ ta ti ngaaka.
Muyunda ta ti, okwa kumagidhwa oombelelwa dhiitopolwa iinene, omalelo goondoolopa oshowo omalelo gopamuthigululwakalo opo ga tseyithile nokukumagidha aakalimo yawo ya kuthe ombinga mesiku ndyoka.
“Uuministeli otau ka gandja oshimaliwa shokulanda iilongithomwa esiku ndyoka, ihe natango omalelo otaga indilwa ga longithe oshimaliwa ge na opo iilongithomwa yi gwane,’’ ta kumagidha ngaaka.
Uuministeli owa indile wo omandiki, omahangano oshowo uuministeli wa yooloka opo aaniilonga ya kuthe ombinga mesiku ndyoka. ‘’Esiku ndika otwa hala lyi kuthwe ombinga kukehe gumwe, opo oshilongo shetu shi yele. Ehala lya yela olya halika kukehe gumwe,” ta ti ngaaka. Ta gwedha po kutya uuyogoki owa simana, onkene otau kalekwa po ashike uuna tau tameke mukehe gumwe, oshoka kap ena ngoka ta hala okukakeka.
“Kehe omuntu na uve ko esimano lyokoopaleka, opo oshilongo shetu shi kale sha yela,’’ ta kumagidha ngaaka.
Oshiwike sha zi ko, ondoolopa yaShakati okwa li ya opalekwa okupitila melelo lyondoolopa yaShakati.
Aakalimo okwa li ya tsakanene mengathithi enene pomahala ga yooloka mOshakati. – vkaapanda@nepc.com.na