Opolisi moshitopolwa shErongo otayi indile oshigwana opo shi longele kumwe nayo, okukonga aafuthi yatano mboka kwa li ya yi ontuku noshimaliwa N$49 000.
Sha ikolelela kopolisi moshitopolwa shErongo oshingwanima shoka osha holoka lwopotundi 09h00 pomatsakaneno goondjila mepandaanda Rikumbi Kandanga oshowo Theo-Ben Gurirab.
Otaku hokololwa kutya oshiningwanima shoka osha holoka popepi noshitayimbaanga oshinene shoBank Windhoek hoka kwa li taku falwa iimaliwa.
Opolisi oya ti, omukuluntuwiliki goPuma Service opamwe nomuniilonga gumwe okwa li taya nde yu uka kombaanga hoka, sho kwa li ya ponokelwa kaalumentu ye li yatano.
Otaku hokololwa kutya aalumentu mboka okwa li ya homata omakatana oshowo iilwitho yilwe, ethimbo taye ya yugu iimaliwa, nokuya nayo ontuku. Tayi ti, aalumentu mboka anuwa okwa li ya nuka mohauto yoToyota Quest, ndjoka kwa li ya tulwa onomola yokuhinga yiifundja.
Anuwa oonakuyugwa oshmaliwa okwa li ya ehamekwa kwashona. Opolisi otayi ti, kehe ngoka ena uuyelele moshiningwanima moka na lopotele opolisi yi li po pepi naye nenge ya ndhenge koonomola Deputy Commissioner Erastus Iikuyu at 0812464757 nenge Detective Inspector Michael Ambambi at 081 6401 600. Opolisi natago oya kumagidha oshigwana kaashi ende we niimaliwa oyindji komalutu gawo, omanga kaapena egameno.
Tayi kumagidha kutya iimaliwa oyindji nayi kale hayi mbaangwa omanga pena aakeleli yomaliko nenge aapolisi. Aafuthi otaya nyenyetwa oshilongo ashihe. Mehuulilo shiwike natago omukulukandhi omuAngola okwa li a yugwa oshimaliwa N$10 000 moshitopolwa shaShana.
Otaku hokololwa kutya okandjato ke okwa li kayiwa nako ontuku sho kwa li eka thigi mohauto omanga kwa li ta kundu kuume ke.