Opolisi monooli oya ti aafuthi otaya ponokele omagumbo gaantu unene ethimbo lyomutenya omanga ooyene ye li kiilonga.
Otaku hokololwa natango aantu taya tentenwa kaafuthi koondjila ethimbo lyongula omanga ya uka kiilonga, nokuyugwa iinima yawo.
Opolisi oya ndhindhilike eyindjipalo lyomateyo gomagumbo, moka mwa kwatelwa omakwato koonkondo oshowo omahepeko galwe haga ningilwa mboka haya adhika momagumbo.
Otaku hokololwa omulumentu gumwe a li a adha ondunda ye owala, konima sho aafuthi ya li ya ponokele ondunda ye, sho a li a zipo omasiku gaali.
Taku ti, aafuthi mboka okwa li ya yi mondunda moka sho ya tatula ekende nokuteya po uutenda wopomakende. Iinima ayihe anuwa ya yiwa nanyo oyo ngushu yithike N$40 000.
Natango oshiningwanima shimwe osha holoka molukanda oneshila, sho omumati gomimvo 27 a li aadhiika a kuutumba pondje yegumbo noku kuthwa ongondhi ye yo peke koonkondo.
“Onda li nda kuutumba pondje sho nda li nda mono okahauto kena aamati yatatu yomimvo dhopokati kasitopa pungaye,” ta hokolola.
Ta ti, mohauto okwa li mwa zi omulumentu gumwe ta indile omeya gokunwa, sho ngeno anuwa a yamukule kutya kamu na sha, okwa uvu anuwa a pama moonyala.
“Otwa tameke okukondjela ongodhi yandje, omanga yakwawo ye li mohauto,” ta popi ngaaka.
Ta ti, omulumentu ngoka okwa Ii emusindi oonkondo noku matukila mohauto, etayi yi.
Tagwedha po kutya ohauto kayina oonomola konima. Oshiningwanima shoka okwa li sha holoka moshanga sho mutenya.