Sho oompumbwe dha kehesiku tadhi tsikile okugwendhelwa, omahangano gamwe nago otaga gwendhele oondando dhago oshowo iifuta yago yo ko mwedhi.
Ehangano lyomagumbo National Housing Enterprises (NHE) olya pititha kutya, ota li ka gwedhela iishoshela yiifuta, okuza 01 lyaAguste nuumvo.
Ngoka ta kwathele onga omukuluntu mbelewa gokupititha omauyelele mehangano lyoNHE Tuafi Shafombambi, okwa li a popi ngaaka oshiwike sha ziko.
“Shika otashi ningwa sha landula shoka kwa li sha indilwa kombaanga onene yaNamibia, sha ikwatelela komulandu goka komitiye koMonetary opo iifuta yi gwendhelwe, momasiku sho ga li 15 gaJuni nuumvo,” ta fatulula ngaaka.
Ta ti, iifuta mbyoka otayika gwendhelwa noopelesenta ashike 0.5, okuza poopelesenta 7.75 tayi kala yina oopeesenta 8.25.
“Omagwendhelo oga holoka omolwa omaupyakandhi ga li gataalela oshilongo oshowo ekosho lyoshimaliwa oshindji hashi he helwa koNHE,” ta popi ngaaka.
Okwa fatulula wo kutya NHE, ehangano lyopaumweno ndyoka wo natango lya yama kepengalo.
Ta ti, NHE oku li kohi yuuministeli wiitopolwa, ondoolopa, omagumbo oshowo omayambulepo gokuushayi.
Ta ti, ehangano lyoNHE oha li yambindhindha oshigwana shina iiyemo iishona oshowo yo po kati okumona omagumbo gawo yene.
“Elalakano okugandja omagumbo go ngushu yoshimaliwa tayi vulika ku kehe gumwe, momumvo 2030,” ta popi ngaaka.
Oshiwike sha ziko, oCity of Windhoek oya pititha kutya nayo otayi gwedhela oodando dholefa, okuza mo 01 lyaAguste nuumvo, omolwa omahooli goohauto ngoka taga tsikile okulonda.
Omugandji gomauyelele melelo lyondoolopa ndyoka lyoCity of Windhoek Lydia Amutenya, momushangwa gwa pitithwa okwa ti, mboka yena uukalata, ondando otayi gwendhelwa noN$1, okuza N$7.50 tayi ningi N$8.50.
“Mboka haya futu koomuma, nayo otaya gwedhelwa noN$1 okuza N$8.50 tayi ningi N$9.50,” ta fatulula ngaaka.
Ta ti, omagwendhelo ngoka oga ningwa sha ikwa telela ko malandulathano gepangelo oshowo omilandu dhiifuta yoCity of Windhoek. – vkaapanda@nepc.com.na