Elelo lyondoolopa Oshikuku oshowo elelo lyoshilando shaWindhoek, oga shainununa etsokumweuvathano.
Eshainununo ndyoka okwa li lya ningwa netompelo lyokulongela kumwe, opo omalelo ngoka gaali ga vule okuhumitha komeho oondoolopa dhawo, okuputila momukalo gu uka.
Omalelo ngoka gaali oga tsikile okulongela pamwe, sho ga li ga shaina etsokumweuvathaano tango momumvo 2014. Ngashingeyi oga tsu kumwe opo ga tsikile okulongela kumwe natango omimvo ntano komeho.
Mayola gwondoolopa yaShikuku Julia Endjambi okwa ti, okuza nkene elelo lyawo lya panga uukuume nelelo enene lyondoolopa yaWindhoek, olya kala lya pama omimvo adhihe ndhoka dha piti.
“Ondi na omukumo kutya natango otatu tsikile nuukuume uuwanawa okuningila aakalimo yetu omauwanawa oshowo okukandula po omaupyakandhi ya taalela,” ta fatulula ngaaka.
Endjambi okwa gwedha po kutya okuza melongelo kumwe nelelo ndyoka lyaWindhoek oya pondola okulonga iilonga oyindji mbyoka ya humitha ondoolopa yawo komeho.
“Otwa nyanyukwa okutsikila ondjila noshilando shaWindhoek, nondi na omukumo kutya otatu ka pondola oshindji monakuyiwa,” ta popi ngaaka.
“Ohaku popiwa kutya uuna aantu taya longele kumwe, oshindji ohashi holoka nuupyakadhi owindji ohau kandulwa po,” Endjambi osho a ti.
Omugandji gomauyelele melelo lyondoolopa yaShikuku John Siloiso okwa ti, oya kala melongelokumwe ewanawa nelelo enene lyaWindhoek, noya pondola okukandula po omaupyakadhi gamwe, ga li ga taalela ondoolopa dhawo.
“Otatu kwashilipaleke aakalimo yetu kutya otatu tsikile okulonga nuudhiginini oku eta omalunduluko mondoolopa yetu,” ta popi ngaaka.
Omupevimayola gwelelo lyoshilando shaWindhoek Joseph Uapingene okwa popi esiku ndyoka kutya, etsokumweuvathano ndyoka otali kala lya fa ohauto tayi kandula po omikundu pokati koondoolopa ndhoka mbali.
“Otatu tsikile okulongathana oshowo okupukululathana, okupitila mekwatathano ewanawa lyi li pokati ketu, ngaashi naanaa sha tothwa mo momikanda,” ta popi ngaaka.
Ta gwedha po kutya elalakano lyawo limwe olyo okulongela uuwanawa aakalimo yawo oshowo oku ya gwanithila po omauvaneko ya ningilwa.
Uapingene ta ti, oya nyanyukwa noya ilongekidha okutsikila uukuume wawo nelelo lyondoolopa yaShikuku.
Omalelo ngoka gaali oga kwashilipaleke kutya otaga tsikile okulonga nuudhiginini opo ga ete elunduluko, ehumokomeho oshowo okuyambula po eliko lyoshimaliwa moondoolopa dhawo.
– vkaapanda@nepc.com.na