Nonando aafaalelwa taya nyenyeta kegwedhelo lyootakisa ndyoka lyi li metifa, oyendji mOvenduka kaye na uupykadhi nofuto yomabetsa ndjoka tayi ka gwedhelwa okuza mu 01 lyaAaguste nuumvo.
Okutameka lyotango lyaAguste nuumvo omabetsa goCity of Windhoek, otaga ka gwedhela iifuta, omolwomahooli goohauto ngoka taga tsikile okulonda.
Naango Shaanika ngoka ha longitha omabetsa ngoka okuya kiilonga kehe esiku okwa ti, ke na nando uupyakadhi noN$1 ndjoka tayi gwedhwa ko.
“Ondi uvite ko kutya omahooli oga londa, notaga nyenyetwa kukehe gumwe moshilongo. Otatu pandula, oshi vulithe okufuta N$13 motaksi,” ta ti ngaaka.
Ta fatulula kutya, ngeno ohaya longitha oshimaliwa N$39 mesiku, unene kuyo mboka haya kwata ootakisi oolwaali nenge taya futu lwaali omolwoshinano.
Silas Nanyome okwa ti, ondando tayi gwedhwa ko oyi shi okwi indhindhimikilwa.
“Otatu indile wo natango ootakisi kaadhi gwedhelwe noshimaliwa oshindji, oshoka esiku omuntu wa thigwa po kombetsa, oto vulu okwi indhindhimikila ko katekisa,” ta indile ngaaka. Helena Natanael okwa ti, uupyakadhi awuhe owa etwa komahooli, onkene epangelo olya pumbwa oku idhopa mo.
“Ano epangelo itali vulu okuninga po sha, okukandula po uupyakadhi womahooli taga londo?” ta pula ngaaka.
Ta ti, oshimaliwa shoka tashi gwedhelwa oshishona shili, ihe otashi vulika shi ka ninge oshindji, oshoka omahooli onkene ngaa taga tsikile okulonda.
Ta gwedha po kutya, omahooli otaga ningi oombululu moondjato dhawo, oshoka oondjambi dhawo odhi li owala ngaashi dha kala omimvo ntano dha piti.
“Ngele epangelo itali vulu okuninga po sha, nali kambadhale okutseyithila ohamangano oshowo iikondo ya yooloka, opo oondjambi dhetu dhokomwedhi dhi gwedhelwe,” ta indile ngaaka. Omugandji gomauyelele koCity of Windhoek Lydia Amutenya, momushangwa gwa pitithwa okwa ti, mboka ye na uukalata wombetsa, ondando otayi gwedhelwa no N$1, okuza N$7.50 tayi ningi N$8.50.
“Mboka haya futu koomuma, nayo otaya gwedhelwa noN$1 okuza N$8.50 tayi ningi N$9.50,” ta fatulula ngaaka.
Ta ti, omagwendhelo ngoka oga ningwa sha ikwatelela komalandulathano gepangelo oshowo omilandu dhiifuta yoCity of Windhoek. “Kehe omufaalelwa okwa tegelelwa a kale a pewa okambaapila komafutilo, uuna a futa, hoka taka ulike kutya okwa futa ethimbo olyoo tuu ndyoka,” ta popi ngaaka.
Ta gwedha po kutya kehe omufaalelwa ta ka kala ke na okambaapila komafutilo, otaka talika ko onga a londa oshali nenge kaashi li paveta. Ta ti, omutaleli gwomabetsa, otaka kwashilipaleka kutya ayihe otayi ende ngaashi omilandu nomalandulathano omape ga tulwa po, naangoka itaaka iyutha kugo, otaka indilwa a thige po ombetsa.
“Uuna omuhingi inaa hala nenge itaaka gandja okambapila komafutilo, omuhingi na lopotele aaniilonga yoCity of Windhoek mpoka taya ka thikama.
Ondando yomahooli gopetolola oya gwedhelwa petameko lyomwedhi nguka, nongaashingeyi otayi kotha N$22.28 molita omanga yodisela ya londo sigo N$22.77 molitela yimwe. Uuministeli woomina niikwankondo owa tseyitha kutya iiyeti mbyoka ya thiminike opo omahooli ga gwedhelwe oyo epulo lyomahooli muuyuni kaalongithi yago.
“Omahooli ohaga lunduluka kehe omwedhi, sha ikolela komayalulo, kutya otaga yi pevi nenge otaga yi pombanda,’’ ta ti ngaaka.
Uuministeli wiikwamina noonkondo oomwedhi mbali dha piti owa li wa fatulula kutya oondando dhomahooli odha londa molwaashoka oondando dhomahooli inaga dhindwa nandho odha londo. Owa popi momushangwa kutya oshigwana nashi kale sha ngungumana nonando oondando dhomahooli tadhi tsikile okulunduluka.
Omahooli oga kala taga lunduluka omwedhi kehe okuza petameke lyomumvo nguka. – vkaapanda@nepc.com.na