Omukainhu weedula 33 omushivinawa mokuhonga oipilangi ota ti osha fimana ngeenge ovanhu aveshe tave li tula mo mehongo, shihe na sha nee kutya ovomuhoko ulipi po.
Laurencia Haufiku woshiwana shovayelele kwa ti ope na eliudo moshiwana kutya Ovakwanghala unene tuu ovakainhu ihava dulu ofikola noilonga. Ta ti ovakainhu Ovakwanghala navo ove na ashike omaano nounongo ngaashi ovakainhu vakwao notava dulu okuu longifa.
Haufiku oo a dile komukunda Omhito-yamwii moshikandjohoololo shaMundaunngilo mOhangwena okwa putulila ashike pamwe novayelele vakwao.
Okwa ti okwa mona omhito yokuya kofikola fiyo ondodo onhi-10 nokonima eshi a mana okwa kala a talela eshongo loshimaliwa opo a ka twikile elihongo laye kosekundofikola.
Ta okwa tokola oku ya kombelewa yakansela wavo a ka indila opo a tuminwe koshipupudilo shoungomba shaEenhana VTC.
Okwa lombwela Kundana ta ti momundo 2018 omo a tambulilwa mendiki laEenhana koshikondo shoku honga oipilangi omo kwa li a pitila moprongalama yepangelo yokuyambidida oshiwana shovayelele. Okwa mana elihongo euya wotete koshikondo shavo.
Haufiku paife ota longele kehango loReal Value Investment CC ha li longo eesikopa noitaafula momaumbo.
Ehangano lavo paife olo limwe la shivifika nawa mEenhana ha li pewa oilonga yokutula mo eesikopa momaumbo taa tungwa modoolopa.
Okwa ti li oku na ehafo linene eshi a pondola oku mana ofikola yaye shaashi ka kwa li shipu komukainhu te li hongele eifano lokuhonga oipilangi.
“Onda hoolola eifano lokuhonga oipilangi opo ndi dule okulongifa ounongo wange,” Haufiku ta ti.
Okwa ti okwa putukila meumbo naxekulu ou kwa li ha hongo oipundi nomaholo okunwina onghee naashi oshe muxwaxwameka opo naye eke li hongele eifano olo.
Okwa hokolola ta ti ka kwa li shipu petameko eshi a tameka koVTC shaashi okwa kala a telela eshongo lovanhu hava ti kutya omukwanghala ita a mane ofikola.
“Ovanhu okwa li ve na eitavelo kutya ame omukwanghala onghee ita ndi mane ofikola, ashike ina ndi teka omukumo wokulihonga noudinini.
Onda kala yoo vali handi tuwa omukumo kovanafikola vovakainhu vakwetu ovo kwa li tave li hongele omaifano a yooloka,” ta hokolola.
Haufiku okwa hokolola ta ti ovakulunhu vaye aveshe ova xula ko nale efimbo kwa li eli meendodo dopedu.
“Onda tekulwa ku mekulu wange womukwanghala. Onda kulila pamwe novakwanghala vakwetu hatu longo oilonga yokomake ashike ame onda kala dina ohokwe yokuya kofikola shaashi ovahongifikola vange okwa li ve hole nge molwashi ondi na omaano,” Haufiku ta hokolola.
Okwa ti okwa li eudite etumba eshi a mona omhito yokuya kofikola koVTC opo a dule okuyandja oshihopaenenwa shiwa kovakainhu Ovakwanghala vakwao ovo ina va hala okuya kofikola.
“Mopaife Ovakwanghala vahapu inava hala okukala mofikola ohava kala ashike va ka lela eendingosho, inava hala okulongifa ounongo wavo,” Haufiku ta ti.
Okwa weda po ta ti pefimo a li koVTC ova li mo ashike ovakwanghala vavali tava fikola moVTC shaashi osha pumba okumona omukwanghala eli mofikola.
Okwa kunghilila ovakainhu vakwao opo vaha landule vali omipopyo doipupulu kutya oilonga imwe itai dulu okulongwa kovakainhu.
“Ovakainhu natu xulife po okukala twa teelela ovalumenhu vetu yambidide omanga tu na omhito yokulongifa ounongo wetu,” Haufiku ta weda po. – fhmalwa@nepc.com.na