Ovalumenhu vanhe novakainhu vavali ova kwatwa po Omaandaxa eshi va hangika noingangamwifi modoolopa yaGobabis.
Ovafekelwa ova hangika ve na oupakete tava vihi eegrama 23 310 voingangamwifi yocannabis,taku tengenekwa i li pongushu yoN$233 000.
Omupopiliko wopolifi Omupedu Commissioner Kauna Shikwambi okwa hokolola ta ti ovafekelwa ava kwatelwa peinda konima eshi opolifi ya pekapeka motuwa yavo efimbo longula.
Okwa ti omufekelwa oo e li omunambelewa wopolisi oye Petrus Nunuheb (44) omukwashiwana waNamibia opamwe novakwashiwana vakwawo Ovanamibia Milizza Yawa, omukainhu weedula 58 , Kashera Shitembi omulumenhu weedula 39 pamwe naCassius Rodney Neib omulumenhu womido 39. Ovafekelwa vakwawo ovo omukwashiwana waSouth Africa, Pamela Dido, omukainhu weedula 45 osho yoo 45, Dunmore Dzuza, omulumehu weedula 55 omukwashiwana waZimbwabwe.
Ovafekelwa ova anyenwa obooloha konima eshi va holoka momhangu yaGobabis Etitatu.
Oshibofa shavo osha undulilwa komafiku 28 Sepetemba 2022 manga taku nigwa omakonakono e lixwa po.
Opolifi onghee tai kunghilile oshiwana opo shi kale tashi lopotele opolifi kombinga yovanhu ve na oingangamwifi shaashi oingangamwifi inau pitikwa.