Omukulunhuwiliki mouministeli wehongo Sanet Steenkamp okwa kunghilila ovahongifikola opo va xulife po okukala tava hepifa efimbo ngeenge ve li meetundi. Okwa ti ovahongifikola vamwe ove hole okumana po efimbo ngeenge e li meetundi moinima inai fimana eshi hava kala ashike ve li meengodi davo dopeke omanga vamwe ove hole okuya keetundi kwa laata.
Steenkamp okwa denga omufindo ta ti ovahongifikola nava kale tava longifa eefimbo leetundi davo le lixwa po ngaashi naana efimbo la ufwa. Meenghundafana a ninga naKundana Etivali okwa hokolola ta ti eshi ovanafikola tava ka tameka noshikako shavo shaxuuninwa moshivike tashi ya e li olo efimbo kovahongifikola va pumbwa okulonga nelitulemo noshoyo nondjungu. Onghee okwa ti oshikako sha xuuninwa osho shimwe sha fimana moikako aishe.
“Ka pena vali efimbo lokuhepifa, omuhongifikola keshe na kwashipaleke kutya ota longifa ominute 45 dotundi yaye nawa nokukala a fika pefimbo kotundi,” Steenkamp ta ti.
Okwa weda ta ti ovakulunhufikola nava wanife po okushinakuwanifa shokukala tava konakona ngeenge ovahongifikola otava i tuu ketundi davo pefimbo.
“Ovanafikola ova pumbwa okulongwa nelitulemo opo oilongwa yavo i kale ya pwa ko diva noshoyo okukala va pita nawa noitwa iwa kexulilo lomudo,” Steenkamp ta ti.
Okwa ti ina hala okulopotelwa kombinga yomuhongifikola eshi ina mona ko oshilongwa yaye shaashi keshe omuhongifikola oha kala a pewa efimbo lotundi yaye la wana.
Okwa kunghilila yoo vali ovakulunhufikola novahongifikola opo va kale tava longele kumwe novadali kombinga nghee ve na okuhambula po eefikola davo.
Steenkamp okwa ti unene tuu ovahongifikola hava longo eedondo dopombada ha di shange omakonakono diva inava pumbwa okuhepifa efimbo.
“Osha fimana ngeenge omuhongifikola ta wanifa po oilonga yaye pefimbo nokukala a kwashipaleka kutya ovanafikola ava ve na ounghundi moshilongwa yaye ova pewa eetundi da wedwa po. Onghee eshi otashi eta opo ovanafikola va pite nawa noitwa iwa,” Steenkamp ta ti.
Okwa weda ta ti eefikola nadi kale tadi lalakanene okupitifa ovanafikola noitwa iwa shaashi eshi otashi yandje omukumo keefikola dikwao di ku fe ko oshihopaenwa shokupitifa.