Aakalimo ye li kuushayi otaya nyenyeta kutya otaya mono iihuna yoofuto dhoolefa oshoka oshimaliwa shoka haya pulwa oye wete sha nanena.
Aakalimo yokomikunda hoka kaa ku na oopate dhooteya oya ti, otaya mono iihuna oshoka oshimaliwa shoka haya pulwa ohashi kala oshindji unene, okuyelekanitha naamboka taya felefula ya uka kuushimba.
Veronika Nanyeni okwa ti, oshiwike sha zi ko okwa futithwa N$300 a uka kombuga okuza mOshakati.
“Sho kwa li nda pula kutya oshimaliwa ashihe shoka oshashike, anuwa omolwiinima mbyoka nda li nda londeke, nonando kakwa li ngaa oyindji unene,” ta fatulula ngaaka.
Ta ti, okwa li a lombwelwa kutya osamande yimwe ohayi futilwa N$5O, taku gwedhwa oondjato oshowo oopalasitika dhiikulya,” ta popi ngaaka.
Nanyeni okwa ti, oyu uviteko nawa kutya omahooli oga londa, ihe yo mba ye li kuushayi oye wete ya fa taya thiminikilwa kongudhi unene.
Simson Shekutaamba a yambukile momukunda Onaushe okwa pula kutya olye ha tula po oomwalu guna okufutwa koondjila dhokuushayi.
“Uupyakadhi mbuka owa kala ethimbo nuule, mongaashingeyi ohatu futithwa N$100 okuya kOshakati. Ohatu longitha N$200 okuya noku galuka inookwatelamo shoka wa li waka konga kondoolopa,” ta nyenyeta ngaaka.
Ta ti, opate ndyoka nayi tulwe oteya, pamwe tapu kala pena oshimaliwa shoka hashi futwa po shi shuwike kaantu ayehe.
Ta gwedha po kutya, otwa adha ethimbo limwe taya pulwa N$80, N$90 nenge N$100 ko kutya kapena omwaalu gu li po hagu futwa, ihe ohaye gu kutha momitse dhawo.
Kansela gwoshikandjohogololo shUuvudhiya Timoteus Shivute okwa ti, oondando opo dhi li dhoka dha tulwa po, dha nununinwa iinano ya yooloka.
“Oondando ndhoka ohandhi lunduluka sha ikwa telela koondongelwa dha humbatwa komufaalelwa oshoka ohandhi fututilwa,” ta fatulula ngaaka.
Ta ti, oondando ndhoka ohandhi tulwa po kaahingi opamwe naanamukunda uuna ya tokola ayehe ondando ndyoka.
Kansela natango okwa popi kutya sigo ompaka opate yokOnaushe kayi li mo nomo tengenekothaneko lyokutulwa opate yo teya, ihe otayi ka opalekwa ashike.
– vkaapanda@nepc.com.na