Omunambelewawiliki woimuna mouninisteli wounamapya Dr Albertina Shilongo okwa ti momukunda Oshandi moshitukulwa shaHangwena omwa monika omikifi wepunga we li te yela meengobe.
Shilongo okwa yelifa ta ti omukifif wepunga ohau kwata ashike eengobe.
Okwa ti omukifi ou owa monika neudo momafiku 31 Mei konima eshi omunahambo umwe kwa li eli kohambo yaye moAngola e na eengobe daye kwa li tadi fi po.
Okudja opo vati omunahambo ou okwa shinga eengobe daye fiyo okumunda wavo koShandi nokonima okwa shivifila ombelewa younamapya kutya oku na eengobe daye ta di vele.
Shilongo okwa hokolola ta ti eshi kwa ningwa omakonakono kovanambelewa woimuna oindjemo oye uya tai u like kutya eengobe daye oda kwatwa komukifi wepunga.
Okwa yelifa ta ti fiyo opapa kape na eengobe da lopotwa da fya komukifi wepunga moshikandjohoololo shaNdobe.
“Kape na eengobe da pitikwa di dje mo moshikandjohooolo shaNdobe ina ndi ningilwa omakonakono tete. Onghee oovene veengobe nava kale vakwashipaleka kutya ova lopotele eembelewa detu tete manga ina va twala eengobe davo keenhele da yooloka,” Shilongo ta ti.
Okwa ti eengobe di na omadiliko omukifi wepunga nadi lopotwe pefimbo opo ovanambelewa va kale ve uya diva okukwafela.
“Omadidiliko omukifi wepunga: omukolo, ongobe ina omanina taadi moyulu efimbo keshe, ongobe tai fuda noudjuu ile ongobe ngeenge ya nangala itai dulu oku ende yoo oya kanifa ehalo lokulya,” Dr Shilongo ta ti.
Okwa kunghilila oshiwana opo shi ha lye ombelela yeengobe da monika omukifi wepunga shaashi sha nyika oshiponga.
“Oovene veengobe va hala okutoma eengobe davo nava lopotele tete ovanambelewa voimuna opo ve uye okuningila eengobe omakonakono ngeenge ota di dulu tuu okuli wa,” Dr Shilongo ta ti.
Okwe weda ta ti omukifif ou owa nyika oshiponga keengobe shaashi ohau kwata eengobe komapunga naashi oha shi eta opo ongobe i kale ya fya diva.
“Oshiwana nashi topolafane ouyelele kombinga yomadiliko momukifi wepunga opo shi dule okulopata diva ngeenge sha mono omadiliko eli keengobe,” Shilongo ta ti.