Kansela woshikandjohoololo Epembe Matheus Nanghama okwa hokolola ta ti epangelo ole shi pondola okukala la eta omayakulo e li nawa moshikandjohoololo oo a kwatela mo eepomba domeva.
Okwa ti fiyo opapa moshikandjohoolola shaye omu na eepomba domeva di li 114 hadi yandje omayakulo kovanhu vahapu, omanga vamwe ohava nu natango meemboola.
Kansela okwa popya yoo vali kombinga yomayakulo amwe e li moshikandjohoololo shaye ngaashi eefikola 19 domeefikola 21 di na olusheno, hano eefikola mbali adike dihe na olusheno mEpembe.
“Moshikandjohoololo shange omu na eembelewa depangelo da yooloka ngaashi ouministeli woukashik kookanhu, ombelewa younamapya, ombelewa wouministeli womidingonoko noshoyo oshitaashi shopolifi,” kansela ta hokolola.
Okwa hokolola ta ti moshikandjohoololo shaye omu na yoo omatenda avali omakwatafano, noupangelo vatatu.
Nanghama okwa dimina kutya nonande epangelo la kendabala oku eta po omayakulo mahapu, oshikandjohoololo shaye osha talela omashongo eendjila dii.
Ashike ovakwashiwana ova hokolola tava ti oshikandjohoololo shavo osho shimwe sha talela omashongo mahapu, unene oomeme ve li momatelelo ova talela eshongo linene. Tava ti oupangelona ovo veli mo inava wana, noha va fininikwa op ova ende oinano ile ya fika fiyo opeekilometa 30 oku ya komafulo.
Ova hokolola tava ti ngeenge oomeme tava fetwa oha ku dengelwa eetuwa dopolifi opo di uye okuyambidida shaashi oshiwana oha shi di kokule noupangelo noshoyo vali eendjila da uka koupangelo odi na efululu. Tava ti ove na yoo oudjuu womeva omeemboola oo ma lula no kamwawa noku nuwa kovanhu
“Oshikandjohoololo shetu osho shimwe shihe na ovanhu vehe li meengudu domilameno eshi hatu holola nelitulemo ongudu tai pangele ashike konima ngeenge ongudu tai pangele oya findana omahololo iha i uya okutala nghee hatu mono oixuna mEpembe,” omukwashiwana umwe ta ti.
Silas Nepembe omupopiliko welelo loshitukulwa shaHangwena okwa lombwela Kundana ta ti ombelewa yavo oya tula moilonga eepoloyeka dihapu ta di ka longwa moshikandjohoololo shaPembe neudo.
Nepembe okwa ti omikunda di na eembola domeva malula mEpembe ota di ka longululwa omanga omikunda dimwe po ota di ka tungilwa eembola domeva.
Epukululo
Oshivike shadja ko, Kundana okwa li a lopota kutya Nanghama okwali a popya kutya ovakainhu ve li momateelelo moshikandjohoololo shaye ohava ende eekilometa oku ya koipangelo. Ashike eshi osha puka, edi oda li da popiwa kovakwashiwana pefimbo Kundana a talela po oshikandjohoololo Epembe.
Kundana ota yandje ombili kuKansela omolwa etumhakano eli.