Komufala woshikondo shomavyulonghalo moNamibia Commissioner General Raphael Hamunyela okwa ti oshikondo shomavyulonghalo osha talela eshongo linene leekompiuta ina di wana okulongifwa kovanambelewa.
Okwa ti ovanambelewa komavyulonghalo ohava longo noudjuu ngeenge tava longo oilonga ya yooloka hai dulu okulongwa nokomompiuta.
Hamunyela okwa ti eshongo loshimaliwa olo unene la eta opo komavyulonghalo ku kale kuna omhumbwe yeekompiuta ina di wana.
Edi oda popiwa kuHamunyela pefimbo a ninga eenghundafana naKundana Etitatu eshi a hokolola ta ti koshikondo sheedolongo okuna ovanambelewa hava kala tava longifa okompiuta imwe ve li vanhee shaashi kapena sha eekompiuta da wana.
“Ngeenge owe ya komavyulonghalo oto hange omunambelwa eli ofika a telela mukwao a mane tete okulongifa okompiuta opo naye a dule okulonga oilonga yaye,” Hamunyela ta ti.
Okwa ti naashi oha shi eta opo ovanambelewa va ha longe vali oilonga yavo pefimbo omanga vamwe ohava kala ve na oilonga ili konima ina i pwa.
“Ohandi indile ovanangeshefa, omahangano opaumwene oshoyo ovaleli vopapolitika opo veu ye momwaalu muhapu okuyambidida omavyulonghalo neekompiuta,” Hamunyela ta ti.
Okwa ti kukeshe ou e na e halo lokuyandja eekompiuta komavyulonghalo na kwatafane novakulunhuwiliki komavyulonghalo ayeshe moshilongo.
“Osha fimana ngeenge a tu yambidida omavyulonghalo opo ovanambelewa va dule okulonga oilonga yavo noupu nokukala yoo vali va yandja omayakulo elixwa po moshiwana nokovanadolongo,” Hamunyela ta ti.
Okwa weda po ta ti oshiwana nashi fimaneke omilandu doCovid-19 ngeenge tashi shi u ya okutalela po ovakwapata vavo ve li modolongo opo kukelelwe etandavelo lombuto komavyulonghalo.