Komufala wopolifi moshitukulwa shaMusati Commissioner Titus Shikongo okwa ti neudo moshitukulwa shaMusati omwa fya nale ounona vatano va wila momeva.
Titus okwa kunghulila ovadali opo va kale tava tonatele ounona vavo ngeenge ounona tava i kondje yeumbo unene tuu pomidingonoko edi dina omatale omeva.
Okwa ti ounona va shona inava pitikwa okukala tava ka lifa popepi neendobe shaashi ohava kwatwa komhepo okudanena omeva do eendobe dimwe odile nai.
“Ovadali nava kale tava kunghulile ounona vavo opo vaha danene omeva ngeenge tava di keefikola, ounona nava pewe ouyelele kombinga nghee sha nyika oshiponga ngeenge omunhu a wila momeva,” Shikongo ta ti. “Ngeenge ondjila hai endwa kovanafikola oya talama omeva ovadali nava ninge eenghendambala nokukala tava twala nokuka tala ko ounona vavo keefikola,” Shikonga ta ti. Okwa weda po ta ti ovanhu veli koshi yomalodu navo inava tauluka omeva shaashi otava dulu okuwila momeva nokufya.
Mexuliloshivike okaana kokamati keedula nhatu oka fya eshi ka wila mondobe yomeva komukunda Omutaku, konima eshi kwa li tava dauka nava kwao mondobe yomeva.