Pastoli oshowo omuwiliki gomagongalo goongeleka tadhi ithanwa Full Gospel Church of God, Jeremia Wilbard Iyambo, okwa holola euvo nayi sho anuwa oshitayingeleka shawo shimwe sha patithwa nomatompelo gaashi goshili. Ta ti, ongeleka yawo yimwe yomomukunda Omupindi moshitopolwa shaHangwena oya li ya patithwa Etiyali lya zi ko, komukuluntu gwopolisi gwiikwamauyelele moshigwana Christine Dafonsech netompelo lyaa shi anuwa lyoshili.
“Edhina lyongeleka yetu nali ze mo momusholondondo goongeleka dha tothwa mo kaadhi li moshili. Ongeleka yetu kayi na uupyakadhi nando, se itatu pukitha oshigwana,” ta popi ngaaka.
Ta ti, okwa li a yi moonkundathana namwene gwegumbo mpoka kwa li hapu gongalele ongeleka ndyoka, ngoka anuwa a fatulula kutya uupyakadhi owa kala mo nale momukunda moka, omanga ongeleka ndyoka inaayi ya po.
“Mwene gwegumbo okwa ti uupyakadhi owa hwama ashike unene konima ongeleka ye ya po, ashike inau etwa mo kongeleka,” ta hokolola ngaaka.
Iyambo okwa ti, ongeleka yawo kayi na shoka hayi ningi sha puka, ihe ohayi gandja ashike euvitho lyoshili moshigwana.
“Ongeleka yetu ihayi andjenekele oshigwana sha shi ka longithe nenge tashi pula oshigwana iimaliwa, onkene shoka tashi popiwa kutya oya eta etumpakano momukunda kasha shi shoshili,” ta popi ngaaka.
Ta gwedha po ta ti, ongeleka yawo moshilongo muka oye ya mo momumvo 1957, ihe shoka osho kwa li oshikando shotango ongeleka yawo tayi hokololithwa.
Ta ti, oongeleka ndjoka oyi na iitayingeleki 11 kiitopolwa yokuuzilo oshowo iitayingeleki yi li 13 okuza mOshakati sigo Opuwo.
Jeremia okwa li a popi natango kutya ngoka a li kongeleka ndjoka ya patwa kakwa li omusita, ihe omwiitedhululi ashike ngoka kwa li a hala oku eta evaangeli popepi naamboka kakwa li taya vulu okuthika kiitayingeleki yokokule.
Dafosech esiku ndyoka a li patitha oongeleka okwa li a fatulula kutya ke na nando uupyakadhi noongeleka tadhi uvitha moshili dho tadhi longele kumwe noompango nomalandulathano.
“Omusita oku na okukala e na onzapo okuza kosikola yuusita oshowo oombapila adhihe dhepitikilo lyokuuvithila pehala mpoka,” ta popi ngaaka.
– vkaapanda@nepc.com.na