Esiku lyohole ndyoka hali dhimbulukwa aluhe momasiku 14 Febuluali, ihali dhimbulukwa ashike komukiintu nomulumentu ye li mekwatathano lyopahole.
Kundana Etitano okwa li a yi moonkundathana dhopangodhi naantu ya yooloka, aayihomboli oshowo mboka kaaye li momakwatathano gopahole naalumentu nenge naakintu, opo ya tye ko sha kesiku ndika.
Suoma Shikalulu okwa ti oshigwana osha uva ko ohole epuko.
Ohole omaiyuvo omawanawa pokati komuntu nomuntu.
“Ohole ohayi vulu okukala pokati kokanona nayina nenge nahe, aamwayinathana, aashiinda oshowo ookuume,” ta fatulula ngaaka.
Ta ti, esiku ndyoka oyendji ohaye li dhimbulukwa noku li dhana ashike naamboka ye li momkwatathano nayo gopahole, ihe hasho shi na okukala ngaaka.
Shikalulu okwa popi kutya ohole nayi ziilile aluhe momagumbo.
“Kehe gumwe nena na lombwela kehe ngoka e hole kutya oku mu hole ngiini noku mu hole shi thike peni,” ta kumagidha ngaaka.
Sam Simon ngoka ta ti, okwa kala omimvo 10 mohombo okwa ti esiku kehe kuye esiku lyohole.
“Omukulukadhi gwandje ohandi mu uvitha nawa kehe esiku tandi zi mo megumbo nenge tandi ya mo, momikalo dha yooloka,” ta popi ngaaka.
Ta ti, okuuvitha omuntu ohole itashi ti ashike oku mu pa omagano gopeke, ihe oku mu ulukila nkene a simana kungoye.
“Nonando ku na oshimaliwa okulandela omuholike goye okaleke nenge shoka e hole esiku ndyoka, oto vulu oku mu uvitha nawa momukalo gumwe itaagu longithwa oshimaliwa,” ta popi ngaaka.
Selma Nickodemus moonkundathana naKundana okwa ti, esiku lyohole nali simanekwe ashike ngaashi lya tulwa po, ngaashi omasiku omakwawo haga dhimbulukwa.
“Esiku ndika lyonena onda hala okupewa sha oshiwanawa shoka tashi nyanyukitha omwenyo gwandje, opo nangaye ndi mone wo kutya ondi holike,” ta po pi ngaaka.
Ta ti ite shi uvu ko nando, ngele esiku ndyoka olya piti inaa pewa sha, okuza komuholike gwe nenge kukuume ke kopothingo.
Shapwanale Ndjoba okwa ti, esiku ndyoka lyohole ohe li dhimbulukwa pamwe naakwanezimo ye, ookuume ke oshowo kehe ngoka e hole.
“Esiku ndyoka olyo ku ulikilathana ashike nkene mu holathane kasha na kutya olye,” ta ti ngaaka.
Ndjoba okwa ti esiku lyohole olyi na okukala lyu udha ombepo yombili.
–vkaapanda@nepc.com.na