OSHAKATI – Opolisi moshitopolwa shaShana oya manga po omulumentu gwomimvo 32, sho anuwa a adhika niingangamithi yomundjundo yookilogalama 4.14, yi na ongushu yoN$207 000.
Oshiningwanima shoka osha ningilwa momundhingoloko gwOshakati West, moka omufekelwa a mangelwa mOmaandaha.
Omugandji gwomauyelele moshitopolwa shOshana Thomas Aiyambo okwa ti, onkundana ndjika oye ya puuyelele sho kwa lopotwa kutya ope na egumbo hali landithwa iingangamithi momundhingoloko.
Opolisi anuwa oya ningi oshikonga showina, niingangamithi mbyoka oya li yaadhika megumbo moka hamu zi omufekelwa.
Megumbo natango anuwa omwaadhika oshimaliwa shoN$3000 koomuma taku fekelwa sha zi mokulanditha iingaamithi.
Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi, okushonopaleka eteye po lyaanona oshowo lyAanamibia.
Tayi gwedha po kutya aavali mboka ye na aanona taya landitha iingangamithi momagumbo naya tseyithile opolisi, ihe haku holeka, oshoka aantu mboka inaya pumbwa okukala moshigwana otaya teyagula po aantu, oya pumbwa okukala moondjendhililo.
Oshigwana oshataalela omaupyakandhi ngoka taga teyagula po oonkalamwenyo dhaanona unene momalukanda oshowo kooskola.
Omukiintu gumwe ngoka edhina lye lishiwike kuKundana okwa nyenyeta kutya oya tala iiningwanima yili ngaaka tayi holoka momindhingoloko dhawo, ihe oye na uumbanda okulopotela opolisi oshoka aashingithi yiingangamithi oya nika oshiponga.
“Aalandthi ohaya gandja kaanona yawo yaka landithilwe koosikola, shoka tashi teyagula po onakuyiwa yaanona yetu,” ta nyenyeta ngaaka.
Caption: Iingangamithi…Gumwe a mangwa