Olutu lwomulumentu ngoka taku fekelwa e na uuvu wopamandhilandhilo anuwa olwa andhika pondama yomeya ndyoka hayi gandja omeya momundhingoloko gwaHelao Nafidi.

Oshiningwanima shoka anuwa osha holoka komatango gEtiyali moshitopolwa shaHangwena.

Omunambelewa omukuluntu moshipangelo shEngela Odon Nkongolo okwa ti, oshiningwanima osha holoka kondje yoshipangelo Engela, ashike omunuumvu okwali a kwatelwa moombete mEngela.

“Pethimbo ndika itandi vulu okugandja uuyelele oshoka kandi wuna auhe, aanambelewa oyeli metifa okugongela uuyelele opo ndi vule okuu gandje,” ta po pi ngaaka.

 Sha ikolela kuuyelele wa gandjwa ku gumwe gwomaaniilonga moshipangelo, omunuumvu ngoka okwa falwa koshipangelo sho kwali ta kambandhala okwi ikutha omwenyo kegumbo Omaandaha.

“Aapangi oya kala noku kondja nomunuuvu ngoka sho a kala ta piyagana sigo a tulwa miiketanga. Konima shoo aapangi ya mono a kala nawa oya li ye mu mangulula mo miiketanga,” ta hokolola ngaaka.

Ta ti, sho a thigwa mondunda oye awike, otaku fekelwa a pitile mekende lyokandjugo, oshoka pomuyelo ina pita po mpoka pe na aapangi.

Otaku fekelwa kutya omulumentu ngoka oku na okukala anuka ondhalate e tayi kondama hoka aadhika a imangelekela koshitenda shili pondama..

Opolisi sho yathiki oyaadha nale omulumentu ngoka iimangeleka.

Oshigwana natango osha nyenyeta kutya oshipangelo shEngela kashi na egameno lyaanumvo lya kola, oshoka aanumvu oyendji ohaya iyaka mo taya pitile konima omanga yamwe yeli komakende.

–vkaapanda@nepc.com.na