Aanafaalama yiimuna yokiitopolwa Oshana nOmusati, oya kala ye na uumbanda wiimuna yawo yi se kenota, otaya ka mona omeya moomwedhi dha taalelwa shoNamWater ta ka pomba omeya mokanala kUuvudhiya.

Oyendji ye na oohambo dhi li kuumbugantu, oya kala nokunyenyeta iimuna yawo tayi si enota oshoka omithima niishana oya kukuta omolwomuloka inaagu loka nawa nuumvo.

Omukuluntuwiliki konooli mehangano lyoNamWater Hieronymus Bartholomeus Goraseb okwa ti otaya tameke okupomba omeya omwedhi nguka.

“Okuza momasiku 15 gaJuli nuumvo otatu ka tameka okwoopaleka okanaala hoka ku uka kUuvudhiya opo tu vule okuthitulula nokukutha mo mondjila shoka tashi vulu okukeelela omeya ga tondoke,” ta fatulula ngaaka. Ta ti, uuna ya mana okwoopaleka, otaya tameke nduno okupomba omeya opo ga vule okuthika komahala ngoka ku na iimuna ya sa enota.

Kansela gwoshikandjohogololo shUuvudhiya Timoteus Shivute okwa ti NamWater okwa kwashilipaleke kutya otaka tameka okupomba omeya momasiku omafupi komeho. “Nonando omeya ngoka taga nuwa kiimuna ngashiingeyi kage shi omayamba lela, ondi na omukumo kutya itaga pwiine po omanga ngoka taga pombwa inaaga thika,” ta fatulula ngaaka. Ta kumagidha oshigwana shi indhindhimike sho shi ekelehi uumbanda wokukanitha iimuna yawo kenota, oshoka epangelo olya kutha onkatu onene okuyanda uupyakadhi mboka wu holoke.

Kansela gwoshikandjohogololo Oshakati East Abner Shikongo okwa ti onkalo yenota otayi ende tayi yaga kesipa, oshoka omithima niishana mbyoka hayi kala omeya oya kukuta.

“Iimuna yetu otayi nu ashike koopomba nokomandoloma gomeya, oyo iimuna oyindji.  

Ta ti, omulonga ngoka tagu ithanwa “Yinakulu Yomadhiya” ngoka ihaagu pwiine, ogwa ningi ethimbo inaagu lokwa komvula, shoka hashi lulike omeya, e taga kala itaaga vulu okunuwa kiimuna.

Aanafaalama ya yooloka otaya nyenyeta kutya ngele onkalo ndjoka itayi lunduluka methimbo efupi, otaya ka kanitha iimuna yawo kenota. “Okwenye okwe ya, iimuna ohayi pula okunwa omeya ogendji ethimbo ndyoka,” taya ti ngaaka. Ya gwedha po kutya ngele NamWaer otaka pomba omeya ngaashi ta ti, na kwashilipaleke kutya otaga thiki pethimbo nokomahala agehe, opo ya hupithe iimuna yawo.   -vkaapanda@nepc.com.na