Paulina Ndalikokule
Mwene gwehangano lyoNahole Security and Depts Collections Services CC Sem Shilimela okwa dhiki oonyala mevi okutya ko sha komanyenyeto ga ningilwa ehangano lye kaaniilonga haya tonatele omaliko taya ti anuwa ihe ya sile oshimpwiyu kombinga yomizalo osho wo okufuta ondjambi ya gwana po.
Shilimela sho a pulwa a tye ko sha komapopyo ngoka moonkundathana naKundana okwa tindi okuyamukula omapulo.
Aatonateli yomaliko yamwe twa popi nayo haya longele poosikola momukunda kOshikunde oya nyenyeta kutya ehangano anuwa nkene owala lya kwatele otendela yoomvula ndatu ngashiingeyi okuza mo31 December 2021 inaya landelewa wee omizalo dhiilonga.
Sha ikolelela komwiinekelwa gumwe a tseyike konzokundana ndjika ngoka a popile ko aatonateli yomaliko mbaka okwa ti oya kala nokuzala omizalo dha tuuka uule woomvula ndatu taya si uutalala unene tuu pethimbo ndika lyokufu.
“Ohashi kala oshilengithi sho oshiyematitha sho tatu yolwa kaanasikola nokuulwa omadhina omawinayi kuunona uushona oshoka otwa zala iikutu ya tuuka,” ta ti sho a popi nayo.
Okwa ti sho ya kambadhala okuzala iikutu yawo yopuamwene, aanasikola, aaloongi osho wo aatalelipo oya kala inaya hala oku ya pitika longe iilonga yawo taya dhenge omuthindo kutya aatonateli yomaliko ohaya kala ya zala omizalo dhomahangano gawo.
“Otwa shayina okontalaka tatu kala tatu futwa N$8,50 kehe mowili, kumwe N$2 940 omwedhi kehe ashike omwedhi gwotango otwa futilwe N$1 088 sho twa nyenyeta oya tameke haya futu ashike N$2 040 okuza nkene twa tamekele mo 2021 sigo onena. Otwa hala okutseya kutya iimaliwa mbyoka n$900 mbyoka ihaatu mono oomwedhi adhihe dhoka ohayi yi peni sho ihatu yi pewa,” ya gwedha po ngaaka.
Otaya ti oya hala okufutwa iimaliwa myokuza nkene ya tameke oshoka manga okontalaka yehangono ndyoka inayi pwa ko nuumvo. Ta gwedha po kutya inaya tseyithilwa kutya ohaya nanwa iimaliwa yasha, inashi shangwa mookontalaka dhiilonga ndhoka ya shayina.
Shilimela kofuto natango okwa tindi okutya ko sha osho wo okuzimina nenge okuyamukula omapulo gasha.
Aatonateli yomaliko oya li wo ya ningi oonkambadhala okugandja omakemo gawo uuministeli waaniilonga oomwedhi ndatu dha ka pita mEenhana.
Omuniilonga gumwe mombelewa moka okwa koleke kutya omanyenyeto ngoka oye ga pewa notaga konanakonwa.
-ndalikokulep@gmail.com